Grupo Uni y su cantante Jose David ta un di e finalistanan di e Festival di aña pasa Un Canto pa Himno y Bandera di Aruba. Door di e pandemia di COVID-19 e parti final di e festival su categoria di adulto no a tuma luga. Esey, segun Jose David, a duna nan hopi tempo pa evoluciona nan cantica.
E final ta tuma luga den e prome fin di siman di maart ora cu lo tin e festival cu su categorianan infantil y hubenil.
Jose David tin masha elogio pa e esfuerso cu organisadonna ta haci pa organisa e festival aki. E ta haya cu esaki no ta momento pa critica. Si e festival mester tuma luga cu 12 mucha so, lag’e tuma luga. Y si ta tres mes, e festival mester sigui. Cu e pandemia tumando luga, cualkier cantidad cu haya pa participa ta bon. “Mi mes tabata pura pa e final di adulto tuma luga y mi tabata bisa djis pone un hurado na mesa y nos ta canta y cla.”
Loke e cantante tambe a bisa cu e lo sinti sigur un poco straño na momento di presenta su cantica. E ta straño pa participa den un festival, canta pero sin publico bo dilanti. “Nos mester djis pensa riba e publico cu ta sigui nos via di e pantaya di television. E publico semper ta importante pa un cantante.” E festival ta imporante pa duna e pueblo e sentimento di un Dia Nacional, mirando cu no tin e celebracion normal di tres dia riba Plasa. “Ami mes tabata gusta bay e eventonan ey, pero awo no por. Kico cu e resulta awo, lo ta bon.”
