E siman aki Corte a dicta sentencia den e caso di un cantante local, pa e delito di a mantene relacion sexual cu un mucha muhe menor di edad. Den e castigo sinembargo a tene cuenta cu e pareha tin un relacion ainda awo cu el a pasa e edad prescribi pa ley.
Ora di menciona Wilman Erody Reyes Perez masha poco hende sa na kende ta referi of kende e ta. Sinembargo ora cu bisa cu ta trata di e cantante Ashrok Gario tur luz ta cende.
Ministerio Publico a trece dilanti e acusacion cu entre 7 di september 2017 y 6 di september 2018, el a tene relacion sexual cu un mucha muhe menor di edad pa ley (15). Pa e delito aki Fiscal a exigi un castigo di 3 aña di prizon, di cual 1 aña ta condicional y dos aña di prueba.
Pero na momento di duna sentencia Corte a baha e periodo den cual e acusacion ta valido, ya cu e otro parti no por a proba cu nan tabata conoce otro y tabatin relacion intimo. Pa e motibo aki y e hecho cu ainda nan ta pareha, a duna un castigo di 365 dia (1 aña) di cual 255 dia ta condicional y dos aña di prueba.
E cantante den declaracion duna a bisa cu el a conoce e hoben aki den temporada di carnaval y el a sigura cu e no a pensa cu e mucha muhe ta menor, bou 16 aña. Den e temporada aki nan a cuminsa un relacion y despues cu e mama a descubri esaki aña pasa, el a haci un denuncia. E mucha muhe di su banda si a bisa cu Ashrok tabata sa cu e tin 15 aña.
E diferencia di edad, Ashrok tin 28 aña, pa Hues tambe a hunga un rol pa declar’e culpabel. Di otro banda por a compronde cu e relacion cu a cuminsa ora cu e mucha muhe tabatin 15 aña a sigui te awe. P’esey a reduci e castigo tambe.
E ariba menciona ta nifica cu e cantante no mester bay cera mas. Pero si e comete un delito similar den dos aña di tempo, e tin cu sinta e castigo nobo y esun bieu si Corte dicidi esey.
