Cantante cera sospecha di abuso sexual cu mucha

E cantante Ashrock Gario, conoci specialmente den temporada di carnaval den e banda Le Groove, desde siman pasa ta cera den cel na Warda di Polis Santa Cruz, sospecha di (taba) tin relacion sexual cu un mucha. Recherche a busk’e na su trabou, no a hay’e y despues a bay busk’e na su cas. Parce cu e cantante, separa di su pareha, lo tin un relacion cu un studiante di EPB cu awor tin 16 aña di edad, pero cu ta den un relacion di tempo largo cu e hoben.

E investigacion ta den man di Jeugd en Zeden Politie. Fiscal di Ministerio Publico a duna ordo pa detene e hoben cantante, despues di a evalua e kehonan entrega den su contra. E caso a cuminsa cana y a mira luz di dia ora e pareha a haya un pleito cu e mucha envolvi. Di eynan esun a keha e otro na Polis. E keho di pleitamento no ta dje importante, pero ora a analisa edad di e mucha muhenan, esey a activa e recherchenan di JZP pa detene e homber mesora.

Den pasado caba un otro figura conoci den comunidad a pasa den un situacion casi similar y a haya castigo di dos aña di prizon, debi na tabatin un relacion sexual cu un menor di edad. E tempo ey a bisa cu e mayornan di e mucha tabata na altura. Ley no ta laga opcion habri pa ningun circunstancia; ta bisa cu tene relacion sexual cu un mucha di 16 aña of menos ta castigabel pa ley. Sea cu e mucha mes kier of no, abo como adulto ta responsabel!

Comments

comments