E ex minister, kende un tempo tabata encarga cu asuntonan di admision di stranhero a duna declaracion relacion cu e investigacion andando y suspension di funcionario na DIMAS. Pa Wever, desde cu el a asumi e responsabilidad pa stranheria, tabata duidelijk cu den henter e cadena bo mester ta mas leu posibel di politica. For di aña 86 hopi biaha minister ta hinca mucho cerca y ta tuma decision y consecuentemente comete actonan di corrupcion. Esaki a sosode na varios ocasion.
Na 2005 Wever a asumi e responsabilidad pa tuma e cartera ki over cu hopi problema. Dia 6 di februari 2006 a bin un delegacion for di Hulanda pa kita e cartera cu ya caba no tabata di Rudy Croes, pero den mi man. E tempo ey a firma un protocol na unda cu Wever tin cu haci cierto cos, no riba instruccion segun e politico, pero ya caba nos tabata bezig e tempo ey.
Wever a tuma nota y tuma decision pa su mes tambe cu mester saca politica for di DIMAS. A traha ley y cambia ley.
Pa juli 2006 ya caba a bin cu e leynan na unda cu, de facto, e minister ta mandateer e hoofd van dienst. E director ta hacie, ami tabata controla, de bes en cuando kico ta pasando y wak si tur cos ta bon. Wever a bisa cu despues di 2009 a ripara cu ministernan a cuminsa hinca nan mes y “aworaki na unda cu e cartera di labor y di vreemdelingenzaken a bin den mesun man, m’a bisa kinan ta problema y bo ta ripara cu cada bes tin algo ta pasa, cu ta e minister ta envolvi”.
E politico ta di opinion cu si ta berdad locual cu ta wordo bisa, cu kisas Hulanda ta bay bolbe hinca nan mes den cosnan interno, cosnan di autonomia di Aruba, e ta kere cu cos aki merece tur atencion di nos tur. Si Hulanda bin haci esaki, ta un mocion di desconfiansa pa henter e gabinete, paso nan tur a para tras di e minister aki; nan tur sa kico ta pasando y toch nan no a tuma e pasonan necesario pa para e cosnan aki.
Booshi Wever: “Anto esaki ta cosnan cu toch mi ta kere pueblo mester ta consciente di dje. Cu, a lo largo, esun cu ta bay sali perhudica ta e pueblo mes, paso e minister por haci kico cu e kier, pero na final ora cu Hulanda bay mete den algo cu ta puramente algo autonomo, bo ta bay haya bo mes den problemanan cu mañan bon por sali afo.” E pregunta ta con leu e Conseho di Minister ta para tras di esaki?
E ta un maneho cu Wever a bin ta ripara di prome di 2009. E ta bisa cu tabatin un maneho paso di 2005 pa 2009 tabatin un maneho estricto. E ta recorda cu el wordo demonisa tanto door di friends and family, pero tambe door di enemies y despues di esey a bin un maneho di open door y open windows. E maneho despues na 2017 a bira cu sin kosijn.
