Candelaria y Arends lo ta “Al Caso” na Telearuba

799

Mañan diadomingo anochi ta tuma luga e siguiente programa “Al Caso” presenta pa Rafael Croes. Telearuba lo transmiti e programa di entrevista pa 8:30pm. Pa e siman aki a invita parlamentarionan mr. drs. Richard Arends y Robert Candelaria.

Durante e programa a contesta un serie di preguntanan y a analisa e situacion actual di gobernacion, decisionnan cu gobierno ta tumando y mas cu tur cos, e rumbo cu nos isla ta tumando, tanto na nivel di relacion den Reino Hulandes como tambe den aspectonan economico.

Richard Arends, siendo ex Minister di Asuntonan Economico di nos pais tin un amplio experiencia y conocemento den maneho di finansa y desaroyo economico di Aruba. E tabata crucial den e esfuersonan pa reapertura di nos refineria y otro plannan pa diversifica nos economia, pa baha nos dependencia na turismo.

Robert Candelaria, siendo un ex-altoinspector di polis tin un conocemento y experiencia amplio den maneho di husticia di nos isla. E tin conocemento di e inkietudnan cu ta biba den Cuerpo Policial, e retonan cu tin actualmente den cual comunidad dia pa dia ta sinti nan mes mas insigur y e posibel solucionnan riba un lista di decisionnan descabeya cu e actual Minister di Husticia ta tumando. Aumento di criminalidad no ta sosode pa casualidad, sino ta resultado di un maneho sin vision, di persecucion y vengansa personal. Cu algun siman di e aña nobo, ya nos conoce tres caso di asesinato, un aumento explosivo den cantidad di casonan social y desobediencia civil. Ta obvio cu pueblo no tin confiansa mas den Gabinete Wever-Croes, ni den nan decisionnan y pio den nan maneho enfoca pa yuda “friends and family”.

Rafael Croes tabatin un reto grandi pa por a conduci e programa, cu tanto pregunta y angulonan pa repasa maneho di e gobierno, pa por a keda toch den e 1 ora di duracion di Al Caso.

Den caso cu bo perde e transmicion di diadomingo anochi 8:30pm, por bolbe mir’e su siguieente dialuna of diasabra den oranan di atardi. Desde dialuna e programa lo ta visibel completo riba e plataforma di YouTube.