Candelaria na Croes: Bo nunca por sinta na mesun banda di husticia cu mi!

Recientemente por a nota cu Parlamentario Endy Croes di Fraccion di MEP ta tira lodo riba tur contrincante politico. Tal ves e ta pensa cu ta di e forma aki e tin cu sirbi su pais. “Ta mi conviccion cu sirbi pais ta algo totalmente diferente. Sirbi pais mester ta algo noble y pesey ami no sa baha na e nivel di politica ey pa contesta su atakenan nunca. Tin asina hopi cos cu mi por bisa di dje, pero mi no ta mira ningun balor agrega den esaki. Su pasado, su potret den boei, e condenanan, ta papia pa nan mes. Pueblo sa caba ken e ta. Nos 2 tin algo en comun cu ta husticia. Ami tabata traha pa haci Aruba un lugar mas sigur y e tabata traha pa fix su mes y haña su mes den cel. Pesey mi no ta bay dedica tempo na dje, pero si na e Minister Presidente cu mester sa miho”, asina Parlamentario Robert Candelaria a cuminsa su contesta durante un conferencia di prensa. 

Keda leu di politica

Nos mester traha na halsa e nivel di politica na Aruba y stop cu e nivel di politica actual. Pa e motibonan aki di polarisacion extremo, hoben y profesionalnan cu tin hopi pa brinda nos pais, no kier drenta politica. Ora bo a studia y bo tin un bon trabou cu bon beneficionan, dificilmente lo bandona esey pa sirbi nan pais den politica, teniendo cuenta e atmosfera hostil y baho cu algun politico ta crea. 

Nos mester por diferencia di opinion riba issues manera maneho den Gobierno, pero mester hiba e discucionnan aki sanamente, bon argumenta y riba e tema. Mester bira cla cu ora bo ta purba di susha nomber di bo contrincante, bo no a sirbi bo pais den ningun sentido. Loke ba logra ta mustra ki tipo di hende abo ta di berdad. E ta bisa hopi mas di Bo cu e ta bisa di esun cu Bo ta trata na susha.

Trabou di Parlamentario

Trabou di un parlamentario ta nifica cu mester controla Gobierno y actualmente tin un Gobierno cu bastante cos canando robes y cu mester adresa. Pueblo ta sclama cu nan no por sigui carga e peso di e gobierno ni di su mal maneho, pero tog bo ta mira cu ta scoge pa laga e trabou di Parlamentario mes para un banda pa busca issues pa susha nomber di otro. Con atakenan politico asina ta yuda e pueblo?   

Contesta na Minister Presidente

Mi a bisa cu mi lo no reacciona riba e parlamentario Croes, pero lo mi contesta e Prome Minister Evelyn Wever Croes si, y lo ta bon pa mi splica dicon mi lo contesta e si. Mi a pensa hopi largo riba esaki prome cu mi a disidi pa contesta. 

Mi trayectoria

Laga mi splica prome algo di mi mes. Despues cu mi a caba mi VWO na Amsterdam, mi a studia pa Inspector di Polis na Nederlandse Politie Academie na Apeldoorn. Mi a conoce mi casa na Hulanda y nos a casa aya. Mi casa ta Arubiano y mi a scoge pa bin traha na Aruba den Cuerpo Policial. Mi mama ta Arubiano, mi yuinan ta naci na Aruba y tur mi tantanan, omonan, primonan y primanan banda di mama, tur mi amigonan y coleganan ta di Aruba. Ora mi a bay traha den sector priva, tambe semper mi a traha pa empresanan di Aruba y den cuadro di esaki mi a muda cu mi famia pa bay biba y traha na Corsou pa empresanan di Aruba! 

Bek na Aruba y den politica

Cu mi a wordo aserca pa bin bek pa sirbi mi pais, no ta nada straño. Cu mi estudio y preparacion, mas biaha mi a wordo aserca pa trabounan y mi no ta considera di a haya un nombramento politico. Cu mi a traha como consehero di Minister y den cuadro di esey a haci algun biahe y tambe muda bek pa Aruba no ta nada contra regla of ley. Cu mi a dicidi pa acepta pa bira activo politicamente y subi lista di AVP y cu awor mi ta miembro di e fraccion di AVP representando pueblo, tambe ta algo cu a bay segun tur regla y procedura. 

Dicho di un Pastor

Mi a tende un Pastor bisa algo hopi importante riba e punto aki, cu ta duna un principio importante pa sigui den bida y sigur den un trabou manera esaki. E Pastor a bisa cu ora hende tira lodo riba bo, bo no mester trata di kit’e. Lag’e seca y e ta cay di mes y ta laga un pleki limpi limpi atras! 

Prome Minister a cay den trampa di su Parlamentario condena

Mi a keda asombra cu nos Prome Minister tambe ta presta su mes pa participa na e tipo di politica aki. Un señora cu tin un pais cu hopi reto su dilanti pa goberna, ta scoge pa presta su mes pa baha na e nivel di politica aki, lagando su trabou para pa hinca energia y tempo den rebaha su mes y rebaha e posicion di Minister Presidente.  

Pueblo no kier e politica aki mas

Cu excepcion di algun siguido di Prome Minister y su Parlamentario, pueblo en general no kier e tipo di politica aki mas. Paisnan cu kier sigui desaroya nan mes y crece no por sigui hiba un politica di antes. Na 2020 hende kier un gobierno cu ta traha pa su pueblo y no un cu ta wordo encabesa pa un lider cu ta orkestra atakenan baho contra su contrincantenan. Niun hende no ta kere nan mas y esaki lo aleha hende di nan y lo sigui polarisa e pais mas y mas. 

Contesta pregunta personal

E Prome Minister mester tabata sa miho ora cu na hopi ocacion nos a manda pregunta por escrito pe y e nunca a contesta. Pero awor cu e ta haña pregunta cu tal bes e mester a orkestra pa trata na mancha otro, e ta contesta den algun dia. Nos ta pensa cu un prome mandatario mester traha na eleva e nivel di politica den su seno y pafo di su seno. E mester lucha pa crea brug entre partidonan y no pa kibra esaki. E prome minister mester goberna un pais hunto cu su ministernan pa hiba Aruba na un nivel mas halto y no mas abou. 

Futura

Mi a keda asombra cu un Premier cu mester tabata sa miho, ta wordo cuestiona personalmente tur dia riba nombramento politico cu e ta tilda otro di dje. Djis pa menciona un ehempel, den e proyecto Futura tin nombracion di hopi famia y conocinan di dje den posicionnan cu salarionan halto, anto scondi bou capa di fundacion.

Bureau integriteit

No ta straño cu un Minister Presidente cu mester sa miho, no por logra lanta un departamento di integridad den 2 aña? Un bureau asina importante pa nos pais cu mester funciona na un nivel riba tur partido politico, ainda no ta logra pa lante. Esaki e mester hinca energia den dje y no den presta su mes pa bay den un nivel di politica infantil. 

Mi coleganan y mi mes a hasi preguntanan riba e.o. RDA, Elmar, bufete di abogado y nan costo, conseheronan, investigacion di oro y e envolvimento of conocemento di e Prome Minister den esaki, a pidi casi 10 biaha pa reunionnan publico riba enseñansa. 

Nunca nos a haña contesta ora ta trata algo cu ta na interes general. Ora ta trata interes personal of politico si prome minister ta parse di ta prome para den rij pa yama su parlamentario y wak den spiel patras pa mira unda mas por tira lodo. 

Gobierno den su “lastlap” hungando “paniek voetbal”

Pero pa mayoria di nos ta hopi cla kico ta pasando aki, ta simplemente cu e rosea cayente di pueblo a cuminsa yega na garganta di e gobernantenan. Awo ta momento cu mester purba susha otro, tira lodo, pasobra nan sa cu pa ora nan caba di pasa tur e medidanan cu nan mester pasa pa cubri e aumento drastico di gastonan di operacion di tur nan famia cu a emplea den Gobierno, cu pueblo sin duda lo manda nan cas “per direct”. Ta algun siman caba ta notando cu Ministernan tur a cuminsa skop bala pa loco estilo “paniek voetbal” y pio ainda cu rato rato nan mes ta anota “auto gol” tambe. Ban laga nan keto pa awor, pasobra e wega lo caba malo pa nan, djis pa nan hugada mes!