Casi 9’or di mainta habitantenan di Rancho ta bati alarma pa un candela grandi, For di diferente skina por a scucha alarma yegando na parcela 3, for di unda a mira e huma ta saliendo.
Ta trata di un cas situa den e caya di Kowloon bay abou. Propietario ta un Arubiano, pero tin mas hende bibando na e cas ey, segun bisiñanan a comenta. Extra-oficialmente ta papia di tres habitante.
Polis a cera tanto e caminda cu ta pasa dilanti e cas como e caminda parti patras y na cada banda a staciona e unidadnan di Brandweer pa basha awa riba e area for di unda tabata mira huma ta sali, pasobra e momento ey no a mira vlam ta sali mas.
Bisiñanan na momento di e candela tabata preocupa pasobra no tabata mira tur e habitantenan di e cas. Principalmente no tabata mira doño di e auto cu semper ta na e cas. Te na final di e candela, nan a yega na e sitio. Autoridadnan a saca e habitantenan di e cas na banda tambe, como medida di precaucion.
E prome indicacion ta cu un Fan a causa un kortsluiting, cu a trece cun’e e candela, cu na prome bista mester bisa a causa basta daño na e cas, no solamente di huma. Funcionario di diferente instancia tabata na e sitio pa cuminsa haci nan investigacionnan necesario.
