Un cancion cu ta zonando hopi na radionan y cu tin hopi hende ta cantando, ta “Un Pueblo di Amor” skirbi pa Danilo Vrolijk y canta pa e hoben Jaydiene Croes. E cancion a capta atencion di masha hopi hende den nos comunidad, no solamente pa su letra cu ta toka e curason pero tambe e forma con e hoben Jaydiene ta canta e cancion cu hopi sentimiento y deseo pa e contenido di e composicion bira un realidad.
Jaydiene Sofia Croes a nace dia 19 di December 2003 pues awe el a cumpli 15 aña, y ta bishitando actualmente La Salle College Mavo Klas 3. Su hobbienan ta; canta y hunga futbol. For di su infancia e ta gusta canta, sinembargo nunca e la bay les di canto. Bo por bisa cu e la nace cu un talento natural pa canta. Otro aña e lo bay cuminsa tuma lesnan di tecnica di cantamento pa asina e por perfecciona su talento.
Jaydiene a participa den un total di 17 festival; Felipe Fest di skol , Festival di Kiniki , Kids Christmas Voice, festival di Aguinaldo, Aguinaldo di Porta, Himno di Bandera, Festival di Ranchera di cual el a gana 11 biaha y 4 biaha el a keda na di dos lugar y un biaha na di tres lugar y un biaha so el a perde.
Aña pasa el lansa e cancion “Niño divino” cual a sali no # 4 na Radio y e aña aki el a publica un CD cu dos cancion di Pasco; esun di aña pasa y e cancion nobo di e aña aki “Un Pueblo di Amor”.
Masha pabien Jaydiene y su mayornan Endy y Dilailah Croes Odor, y pabien tambe na e autor Danilo Vrolijk cu e precioso cancion cu ta conkistando e curason di un y tur. Ken cu scuch’e ta cante despues, specialmente pa su palabranan y melodia asina bunita.
Letranan
Un Pueblo di Amor
Mira con liher luna di advent ja ta den porta
No tin miho celebra pasco na mi isla
Ban prepara pe bendishon cu ta bin di ariba
Pidi Señor tira su lus riba nos suela
Purifica bo curazon pa su benida
Manifesta bo alegria sperando e dia
Ta e mesias , e yiu di Dios nos ta anhelando
Esun cu nos dushi Aruba ta protehando.
Refr: No mas abuso mi ruman, ban uni bos den orashon
E redentor ta refleho di amor 2x
Tene man di bo ruman no mas odio I rencor
Ban conberti , bira e pueblo di Amor.
(Coro: E pueblo di Amor)
Mira e bondad cu creador a mustra mundo
Un amor divino I hopi profundo
E ta e amor cu nos mester tin uno pa otro
Haña e spirito di comparti pa bo tin gozo.
Refr: Ripiti.
********* MAMBO*********
Mi ta sinti cu mensahe a toca e pueblo
Cu tin mas gozo den duna cu recibi
Habri bo porta invite na bo cena
Asina comparti bo krenchi Felicidad.
Refr: Ripiti.
Coro/ Cantante: Aruba Pueblo di Amor.