Cancion nobo di Grupo di Betico: KEDA LEU

482

Grupo di Betico den su forma unico un biaha mas ta saca un produccion nobo pa deleita su fanaticonan pero e biaha aki cu un mensahe di refleccion den e tempo delicado cu nos pais ta pasando aden.

E idea di e cancion aki ta pa conscientisa nos comunidad pa tene distancia. E situacion na Aruba no ta parce di ta bou di control, mirando e situacion eyfo, hopi hende no ta tene nan mes na e protocol y sigur no ta mantene e distancia social cu ta pidi.

Pa e motibo ey Grupo di Betico den forma di un cancion suplica na e pueblo en general, pa yuda otro y yuda Aruba pa baha e contagio. Conscientisa cada persona pa KEDA LEU di otro. Duna cada ken e espacio cu nan mester pa e ta safe. 

Yuda nos scapa bida di esnan mas vulnerable. Intencion cu e cancion ta cu cada biaha cu e resona y recorda cada un di nos pa tene distancia social. Un peticion ta bay na tur DJ y miembronan di prensa, cu tin e poder pa pusha algo den e oyente su cabes, pa porfabor yuda nos yuda Aruba. Vooral awor cu hospital tambe a anuncia cu nan ya no tin capacidad extra mas, nos mester purba baha e cantidad. Boso amigonan di semper di Grupo di Betico.