Diabierna awor 19 di october pa 8:00pm lo resona e fluit pa inicia campeonato di futbol Division di Honor 2018-2019. E prome wega ta den Stadion G.P. Trinidad na Dakota y lo ta entre SV Brazil Jrs y SV Riverplate. A scoge e secuencia di e weganan via tiramento di lot. Diabierna anochi e campeonato ta cuminsa completamente di nobo.

Pa e fanaticonan, tur entrada cu paga na porta ta bay directamente na e ekiponan hungando e anochi ey. Entrada pa adulto ta 7 florin mientras cu muchanan ta paga unicamente 3 florin pa por drenta stadion.

Campeonato 2017-2018

E campeonato 2017-2018 a termina recientemente cu mas o menos 1600 diferente wega hunga tras di lomba. E campeonato di Division di Honor a conta cu 10 diferente ekipo cu hunto a hunga 18 wega den 2 rond. Despues a reduci e ekiponan na e 4 mihonan cu a drenta play-off hungando 6 wega contra otro. E dos miho teamnan a sigui pa final, cu a hunga 3 wega pa asina SV Dakota gana Deportivo Nacional y asina bira campeon di Division di Honor pa e campeonato 2017-2018.

Ing. Richard Dijkhoff, Presidente di Arubaanse Voetbal Bond (AVB)

“E temporada dushi ta cuminsa atrobe, den cual ta uni nos pueblo por medio di deporte. Y e deporte rey Futbol lo luci atrobe, mescos ta e talentonan deportivo cu nos tin riba veld. Mi ta desea tur ekipo tur clase di exito y sperando cu disciplina domina e weganan”, asina Ing. Richard Dijkhoff, Presidente di Arubaanse Voetbal Bond (AVB) a duna di conoce. E ta convenci cu despues di un tremendo campeonato mundial di futbol, cu semper e atencion y interes pa futbol ta mas halto cu nunca.

Tocante campeonato mundial di FIFA 2018

E aña aki tabata e di 21 campeonato mundial di futbol organisa pa FIFA. Cada 4 aña e ekiponan nacional di futbol di hende homber ta bataya contra otro. E aña aki e weganan a tuma luga na Rusia entre 14 di juni pa 15 di juli 2018, como e prome campeonato mundial organisa den oost Europa y e di 11 campeonato organisa den Europa. Ta calcula cu e campeonato a costa un total dik 14.2 biyon dollar Mericano, e campeonato mas caro den historia! Esaki tabata e prome campeonato mundial cu a uza asistencia digital di sistema di video, conoci como e “Video Assistant Referee” (VAR). 

 

Na tur e campeonato mundial di futbol a conta cu participacion di 32 diferente ekipo procedente di 5 diferente confederacion. A uza 12 diferente stadion pa hunga e 64 weganan, den cual a score 169 gol. Atendencia di publico a surpasa 3 miyon, pues mas di 47 mil fanatico pa cada wega. E futbolista cu a hinca mas gol den mundial 2018 tabata Harry Kane di Inglatera, cu 6 gol den mundial.  E campeon mundial e aña aki tabata Francia, cu a gana e titulo aki pa di dos biaha den historia.

Arubaanse Voetbal Bond

A funda Arubaanse Voetbal Bond (AVB) na aña 1932 y a afilia na CONCACAF na 1986 y despues na FIFA na 1988. E ta e organisacion cu ta maneha futbol amateur y profesional, incluyendo muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.

Comments

comments