Diabierna awo pa 10’or di mainta, ta bay tin e famoso Caminda di Cruz bibo pasando den cayanan di Dakota y terminando dilanti di misa tambe cu crucificcion di Hesus na Cruz.

Gina Nuboer ta e motor di e evento aki pa mas di 10 aña y semper tabata tey hunto cu nan. Ta pa e motibo aki nos ta haci un invitacion pa grandi y chikito, pa bin mira e caminda di cruz aki, riba Bierna Santo, saliento pa 10’or di mainta.

Diabierna Santo 19 April tin e Caminda di Cruz Bibo na Misa di Dakota pa 10or AM

Posted by 24ora on Monday, April 15, 2019

E preparacionnan ta den full swing pa diabierna awo, pa por bin trece dilanti un biaha mas e pasion di Cristo na un manera mas real cu ta posibel, den e cayanan di Dakota.

Manera custumber, e ruta ta bay cambia. E biaha aki no ta un excepcion.

E ta sigui dilanti misa, sigiu pa Mispelstraat, te cu Macubaristraat, ta sigui den Appelsinastraat, Pindastraat, Mispelstraat y yega misa, pa e crucificacion y resureccion di Cristo Hesus.

Stashinan

A acerca e casnan caba pa e stashinan. Den Mispelstraat Cristo lo tuma su cruz na cas di Famia Dania. Despues ta sigui caminda cu Cristo ta cay pa prome biaha dilanti cas di Famia Flanegin. Tin diferente cas cu tin e stashinan y e personanan cu ta hopi contento cu nan tin un stashi na nan cas. Ningun famia no a nenga di tene e stashi.

Cambio

Segun Nuboer, e cayanan ta cambi’e pa asina tur hende tin un oportunidad pa e caminda di cruz bibo pasa den nan caya. Tin hende ta hasta pidi si nan ta pada den nan caya, pa nan haya un stashi na nan cas. Pa nan ta algo grandi. Pa e organisacion, ta un satisfaccion grandi, e aceptacion di caminda di cruz bibo. Esaki ta di 11 aña cu ta present’e den e cayanan di Dakota.

Cambionan cu ta bay tin, ta cu ta bay tin un Hesus nobo, cu ta den persona di Julio Peralta y tin algun persona a bin nobo den e grupo di hende muhe, solda tambe tin nobo y a switch algun rol, pa duna otro integrantenan tambe pa haci cierto rolnan.

Cuanto hende ta participa

Un cantidad di hende ta participa, tanto riba caya, den preparacion y rond di dje. Nuboer a splica cu e cantidad di hende ta creciendo tur aña. E biaha aki a cont’e tres biaha pa wak si ta sigur y ta trata di rond di 150 persona.

E gana pa sigui

E punto ta cu e Caminda di Cruz bibo ta real. Bo por mir’e den buki, wak’e na television, pero ora cu bo ta presencia bo dilanti, con nan ta suta Hesus y e sanger ta spart for di riba dje, e ta algo cu ta impresiona y sa di hende cu aña pasa a bin djis pa compaña otro persona y ora cu yega momento cu a hay’e asina impresionante cu nan a bisa cu nan no lo faya caminda di cruz bibo mas. E ta algo tambe cu e muchanan despues ora cu nan bira grandi, nan por conta nan yiunan, nan nietonan cu na Aruba a maak mee di chikito un caminda di cruz bibo, na e manera mas real cu ta posibel.

E historia di Cristo berdad e tabata cruel, manera hopi hende a trec’e dilanti, pero no por cambi’e. Asina e tabata of hopi mas cruel di loke sa presenta durante e caminda di cruz.

Espacio

E espacio a keda suficiente y pa Señor semper tin un espacio. E mes ta habri e espacio pa y ilumina na tal manera cu por presenta su historia, Nuboer a expresa.

Duracion

Ta pidi tur persona pa bin cu algo comodo, si e ta bay cana y tambe algo fresco y nan boter di awa, mirando con nos solo ta. Tin cu proteha nos mes y tambe e muchanan tambe, tambe e grandinan cu un sombre, parasol. E ta algo habri. Nos tur ta bin pa Dios, no ta un show cu ta bisa cu tin cu bay bisti hilchi halto pa bin. Ta bin un procesion cu ta pa Dios pa recorda crucifacion y resureccion di nos Cristo Hesus.

Crucificion

Dilanti porta di misa ta caminda cu Hesus ta wordo crucifica y resucita tambe. Tin cu corda cu Hesus a resucita pa nos y Hesus ta bibo.

Pastoor nobo

Dakota tin un pastoor nobo. Nuboer a splica cu personalmente Pastoor Josef no a mira e caminda di cruz bibo y esaki ta prome biaha cu e ta bay mir’e di cerca con esaki ta. Un gradicimento grandi ta bay na Pastoor Daniel Szpila, cu for di prome instante a duna su bendicion pa e Caminda di Cruz bibo, cu el a bira asina exitoso. E pastoor actual tambe a duna su bendicion y ta full entusiasma cu e Caminda di Cruz bibo, pa diabierna awo pa 10’or di mainta.

Ki ora pa yega

Pa 10’or di mainta e ta sali. Tin cu bisa cu ora cu e personanan yega, preferibel no pone auto riba e ruta, pasobra esaki por tin un of otro consecuencia. Tin hopi hende ta cana y e autonan por wordo rasca pa un of otro tas y cruz ta uno cu ta basta grandi di mas of menos 3 meter y mey. No ta bisa cu e cruz ta bay cay riba e auto, pero no sa nunca kico por pasa y pa evita un ke otro, preferibel no para riba e ruta. Ta conseha yega no mas laat cu 9’or. Ya for di 7’or di mainta tin hende ta tuma nan luga pa nan por sinta dilanti y haya e miho bista di loke ta pasando, pasobra tin hopi hende ta bin.

Ta deliberando pa tent, pasobra e tentnan no ta asina facil e aña aki pa haya nan. Tin cu paga sigur 80 florin pa cada tent si busca nan y mester di 12 pa cubri parcialmente e hendenan grandi cu ta keda na misa ora cu e caminda di cruz sali y caminda di cruz ta wordo resa na misa, mientras tanto cu e otro caminda di cruz ta den e cayanan di Dakota. Ta trata aki ta dos caminda di Cruz na e mesun momento.

Comments

comments