Caminata pa legalisa Cannabis: Mester mas compasion

“Nos ta para pa un sociedad husto, unda e uzo y regulacion di tur droga ta basa riba ciencia, salud, compasion y derechonan humano”, asina Gino Wauben, Presidente di I Legalize Aruba (ILA) Foundation a enfatisa durante nan caminata awe, na ocasion di e dia mundial riba uzo di Cannabis (4-20). E caminata a start 5:00pm for di Arashi pa The Bulldog Aruba na Paseo Herencia Mall. Entre participantenan tabatey tambe Dr. Rudy Lampe, Minister di Enseñansa.

“Si Bo ta bay cerami pa algo cu mi ta hinca den mi curpa, no ta un bon idea. Cerami pa un crimen cu m’a haci contra otro. Por ehempel si mi a dal un hende mata, Bo por cerami. Pero no pa algo cu mi ta haci mi mes. Hopi cos ta pasa cu nos mester wak e realidad di bida”, asina e Presidente di ILA a bisa.

Caminata pa legalisa Cannabis: Mester mas compasion

Caminata pa legalisa Cannabis: Mester mas compasionGino Wauben ta lamenta cu ta enfoca solamente riba Marihuana, sin mira e efectonan desastroso di alcohol. Mientras di un banda kier stroba legislacion di Cannabis, un Parlamentario mes ta canta “Bacardi, Limon, Coca Cola”. E ta puntra con esey por ta?!

Posted by 24ora on Saturday, April 20, 2019

“Pesey nos kier un sociedad y un Gobierno husto, transparente pa papia y un sistema di husticia husto tambe”. Gino Wauben a accentua e hecho cu awendia ta scucha hopi di Cannabis na Aruba, sin tene cuenta cu entretanto cuanto pais a legalisa e uzo medicinal caba. “Nos no ta para pa humamento tampoco, nos ta para pa e medicina cu tin den e humamento”.

Na Merca y na Israel nan ta hasta uz’e den Hospital. Nan ta uz’e asina hopi cu un specialista a bisa cu un hende cu ta huma Marihuana tin 66% menos chens di bira diabetico. Siendo cu aki na Aruba, segun Wauben, e indice di diabetis ta asina halto sin cu tin un cura drechi pe.

ILA Foundation ta para pa reeduca e pueblo, pasobra ta convenci cu nos pueblo ta educa, pero mester reeduca riba e tema si Cannabis.

E caminata awe ta relaciona cu e celebracion mundial, 4-20 mescos cu na Merca, Hulanda. Portugal y tur otro pais na mundo. E hecho cu no tabatin hopi atendencia, Wauben ta sinti cu e ta un cos nobo y publico tin e tendencia di pensa malo prome.

ILA Foundation ta uza como ehempel kimoterapia y radiacion cu Dokternan tradicional ta uza den caso di cierto enfermedadnan. “Marihuana ta hopi mas miho cu e remedinan ey. Esey a mata mi tata, kimo a mata mi tata. Si mi tabata sa 15 aña pasa, mi por a yud’e. Ta di e tempo ey ma cuminsa haci research riba e remedi aki”

Mester conscientisa comunidad cu alcohol ta hopi mas peligroso cu marihuana, pero asina mes nos ta propaganda alcohol tur caminda. “Hasta un Parlamentario ta canta Barcadi, Limon, Coca Cola. Un Parlamentario (Red. Ta referi na e banda BMW cu Hendrik Tevreden cu e cancion “All Out” di aña 1997) mes ta canta esey, con por ta?”, Gino Wauben ta puntra su mes.

Na final Gino Wauben a gradici tur participante, tur cu ta kere den legislacion di cannabis, tur freedom fighters. Ta gradici Dios pa e don, segun Wauben e ta un educador, pa sigui educa tur hende riba cannabis.