Cambio di ley: Mester tin 21 aña pa por cumpra sigaria

Minister Dangui Oduber a anuncia awe un otro ley cu a adapta, e ley di tabaksproducten. E ley presenta door di fraccion di AVP den pasado no tawata completo y a trek in e ley cu parlamentario Marlon Sneek (AVP) a entrega y a haci e cambionan debido y a presenta un concepto nobo, pero awor di e fraccion di MEP.

E ley ta encera un prohibicion general pa huma den areanan publico pa proteha salud di hende y descurasha humamento. A percura pa duna tur e definicionnan necesario, locual ta haci e implementacion mas eficiente.

A aumenta e edad pa por cumpra sigaria di 18 pa 21 aña. Mayornan cu ta huma den compania di un menor di edad ta core riesgo pa haña multa. Esaki ta pa proteha e salud di menornan di edad contra e huma di sigaria. Companianan mester percura pa proteha e salud di su trahadornan tambe. Lo prohibi pa parti sigaria por nada y pa bende sigaria los.

A amplia e ley aki y adapta di un manera cu e ta contene tur e elementonan necesario pa por logra e meta di proteha salud di pueblo en general (secondhand smokers) y pa descurasha humamento na Aruba. Di e manera aki tambe Aruba lo cumpli cu e exigencianan di e Framework Convention on Tobacco Control di Organisacion Mundial di Salud (WHO) y cu nos Plan Nacional di Accion riba Prevencion di Non-Communicable Diseases (NCDs).

Minister Oduber a splica cu si un persona kier stop di huma e por acudi na su dokter di cas cu por dun’e tratamento, si ta necesario. Cerca e POH (praktijk ondersteunende huisarts) e por haya conseho y un “motiverende gesprek”. E persona por haya guia tambe cerca Consultorio pa Asuntonan di Adiccion (CAA). Como alternativa tin dos otro instancia na Aruba, cu ta Aruba Hypnosis Center y tambe Agencia Adventista di Desaroyo y Recurso Asistencial) cu ta un organisacion humanitario.

Si bo ta huma mas cu 10 biaha pa dia of bo ta huma dentro di e prome 30 minuutnan despues cu bo a caba di lanta fo’i soño, tin hopi chens cu bo ta bin na remarca pa haya ayudo profesional di bo dokter di cas.

Minister Dangui Oduber ta conseha pa esunnan cu no ta huma, pa no cuminsa. Pa esunnan cu ta huma, acudi na nan dokter di cas. Door di stop di huma, bo ta reduciendo e riesgo pa un evento vascular cu 70%.