E asina yama “Aanbestedingsverordening” ta e ley cu ta stipula reglanan nobo na momento cu Gobierno tene un destaho publico pa cumpra cualkier servicio of producto. E ley aki ta indica, hopi detaya, e procedura y riba ki suma, cu Ministernan mester encamina na momento di tene un destaho publico. Opcionnan pa desvia di e procedura ta hopi mas limita cu e proceduranan existente cu ley di contabilidad ta brinda. Cu e proceduranan nobo Gobierno no mag di exclui proveedornan di servicio y mester garantisa trato igual na tur. Gobierno tin e obligacion pa publica e destaho y tambe ken a gan’e. E criterionan mester ta den proporcion cu e proyecto.
Segun e cambio di ley proponi awor, proyectonan bou di Afl. 25,000 ta gunning uit de hand; Proyectonan entre Afl. 25,000 y Afl. 200,000 ta onderhands y lo rekeri un destaho publico obligatorio pa proyectonan riba Afl. 200,000. Esaki riba su mes ta un cambio drastico, pasobra awor aki tur suma bou di Afl. 10.000 ta gunning uit de hand; entre Afl. 10,000 y Afl. 100,000 ta onderhands y tur loke ta riba Afl. 100,000 ta openbaar aanbesteding. Pues den cierto forma, Gobierno lo hisa e “drempel” hopi mas halto pa bay un destaho publico. Gobierno lo por recori hopi mas gasto awor sin tin nodi bay un destaho publico.
Un di e reglanan nobo den e proposicion di ley ta encera tambe cu despues cu e destaho termina y otorga e proyecto na un compania, cu Gobierno ta obliga na publica esaki. Y riba dje, Gobierno mester warda un tempo prome cu firma cualkier contract, pa duna esunnan cu no a gana e destaho oportunidad pa bay den bezwaar locual siguramente no ta cumbini ora kier yuda companianan liga na Gobierno.
Presentation Concept Aanbestedingsverordening kort samengevat 26 oktober 201…
E proceduranan nobo lo no conta por ehempel ora cu cera contractnan cu empresanan estatal cu por ehempel ta brinda servicionan di telecomunicacion. Esaki ta significa cu e monopolio di SETAR ta bira hopi mas fuerte pa cu proyectonan di Gobierno, eliminando oportunidadnan pa otro proveedornan. Mescos ta conta por ehempel pa Postkantoor, cu tambe lo gosa di un monopolio avansa, strobando tur otro compania di entrega di carta y documento pa por competi.
Informacion cu a yega na nos ta cu no tin consenso entre Parlamentarionan di MEP-POR-RED riba e tema specifico aki. P’esey algun Parlamentario kier pa Gobierno cuminsa caba di aplica e proceduranan nobo y algun di nan te hasta pa entidadnan sui generis, manera Aruba Tourism Authority, Post Aruba y Serlimar.
OLV 2017-2018-892 aanbestedingsverordening
No ta desconoci cu Gobierno ta honra hopi proyecto den pura, bou di e reglanan existente, cu ta menos estricto cu e ley nobo aki ta prescribi. Na momento cu e ley aki pasa den Parlamento, lo rekeri un cambio drastico di mentalidad di e Gobernantenan, cu lo no por beneficia un grupo di hende so, sino cu tur compania tin e mesun derecho.
Algun di e Parlamentarionan cu ta sostene Gobierno no ta mira e necesidad pa haci e reglanan di destaho publico pa proyectonan di Gobierno mas skerpi. Otronan hustamente kier pa e proceduranan nobo drenta na vigor urgente y ta desea pa haci nan mas skerpi ainda. Es mas, nan ta hasta boga pa Gobierno cuminsa aplica e reglanan nobo di awor, adelantando riba introduccion di e ley.
Ta bon pa bisa cu e trahamento di e ley a inicia bou di Gobierno di AVP. Un ke otro tin di haber cu cumplimento di tratadonan internacional cu a start desde algun aña atras y cu awor e grupo di trabou a keda cla cune. Nan a te hasta duna un presentacion na Parlamento riba e cambionan compara cu e ley di destaho publico existente y e proceduranan cu articulonan 25 y 26 cu ley di contabilidad existente ta prescribi. E ley nobo lo reemplasa tur esakinan. E grupo di trabou tabata consisti di diferente departamento di Gobierno cu a traha riba e proyecto aki pa algun aña caba.
A entrega e proyecto di ley na Parlamento dia 31 di juli ultimo. Mester remarca cu ningun fraccion tabatin pregunta pa haci por escrito na Gobierno. Esaki a nifica cu de facto por a atende e ley di biaha. E prome biaha cu a pone riba agenda tabata 30 di october ultimo, pero a pospone. E di dos fecha tabata awe 20 di november, pero atrobe a pospone. Claro cu e di dos biaha aki a causa hopi pregunta den gangnan di Parlamento y di Bestuurskantoor, riba e posibel motibonan dicon e ley aki no por conoce luz di dia den forma di un ley formal.
Pa evita e berguensa atrobe pa Ministernan ora cu nan no ta riba mesun liña cu e fraccionnan den coalicion, of cu e diferencia di opinion entre e diferente fraccionnan sali na cla y ocasiona un kiebro den coalicion, a opta pa kita e ley aki for di agenda di Parlamento pa tempo indefini!
