Diamars 12 di maart 2019 Camara di Comercio y Industria di Aruba (KvK) lo tin su “Aruba Chamber Town Hall Meeting on ROP”. Esaki lo tuma luga di 6:00PM pa 8:00PM den auditorio di KvK. KvK kier pone enfasis riba e importancia pa e sector empresarial duna nan aporte riba e formulacion di e Plan Preparatorio di Desaroyo Espacial 2019, pues e Ruimtelijk Ontwikkelingsplan (ROP). Comunidad di Aruba tin te cu dia 15 di maart proximo pa entrega nan carta cu puntonan di bista encuanto e ROP. KvK kier haci uso di e oportunidad aki pa haya mas hopi puntonan di importancia cu ta relevante pa inclui den un carta encuanto e formalisacion di ROP.
Mas informacion riba e ROP
Un ROP ta contene e vision di gobierno over con lo desaroya e areanan di Aruba. E ta duna forma na e maneho pa desaroyo espacial. Un ROP ta wordo componi door di e Minister concerni y tin un duracion di 10 aña. Unabes cu e ROP wordo formalisa lo mester continua cu desaroya e ROPv cu ta describi e parti huridico cu tur hende mester cumpli cune. Pa por ta miho prepara pa e town hall meeting bo por bishita e website https://aruba-ro.nl of www.dip.aw caminda tin tur documentacion cu ta relaciona cu e ROP.
Registra pa e town hall meeting
E evento di KvK aki ta uno gratis y durante esaki tur participante por comparti nan pensamento riba e ROP. E participantenan por elabora riba nan puntonan cu e Directiva di KvK y lo tuma nota di tur esaki. Ta pidi si pa por fabor registra bo presencia via [email protected] pa bo ta sigur di tin bo luga den e auditorio.
Pa mas informacion por tuma contacto via [email protected] of yama na 582-1566 ext. 27/35/42/30.
