SKOA a manda informa docentenan cu debi na e calor inmenso di ultimo dianan, lo por tuma medida di precaucion.
Esaki ta encera cu scolnan unda cu tin klasnan cu no tin airco, por manda e muchanan cas cuminsando 11’or di mainta. Esaki por sosode for di awo te cu 25 di september, fecha cu Meteo a bisa cu e periodo di hopi calor lo ta mas intensivo.
No ta prome biaha cu ta tuma e medida aki, ya cu mas o menos dos siman pasa caba a permiti pa manda e muchanan cas, si e klas en cuestion no tin airco.
Segun 24ora.com por a compronde, tin un total di 10 scol cu tin klasnan sin airco. E ta un situacion insoportabel e calor, cu ni cu bentana habri, e lo trece un alivio. Mayornan a haya un carta. Si tin casonan unda cu mayornan no por haya un solucion, segun SKOA a splica, e muchanan en cuestion lo keda cu e docentenan den un camber cu airco.
Diaranson den oranan di merdia e situacion tabata fastioso pa mayornan cu ta hiba nan yiunan na Traimerdia. Mayornan ta bisa cu nan ta paga basta placa toch pa nan yiunan tin un luga di cada despues di ora di scol te ora cu nan caba di traha. Na momento cu a bay hiba nan yiu na Traimerdia na Fatima na Dakota, a bin tende cu esaki a cera pa motibo di e calor y no tin airco eynan. A manda e muchanan bek cas cu mayornan cu en realidad mester ta trahando. E docentenan a bay na e Traimerdia na Morgenster. E situacion aki tin mayornan preocupa pasobra ta hopi dificil pa haya opvang pa yiunan, ya cu ta conta cu nan ta keda na Traimerdia.
