Calbas y su gang a purba agredi famia pasando den Tarabana

Un famia a bay pura den direccion di warda di polis. Na caminda a avisa polis cu nan ta coriendo den un Nissan March color oraño. Nan tras tin un pickup cu un gang. Den e mesun pickup tin e conoci di polis Calbas. E ta un hoben den hopi mal caminda. E tabata tin mascarada bisti pero asina mes a reconoc’e.

E famia den Nissan March tabata bayendo cas y kier a pasa cumpra algo di come den Tarabana. A topa cu Calbas cu su gang cu a cuminsa manda baranca riba nan. Nan a cuminsa core pa evita cu nan ta haya baranca. A core yega warda y avisa di e sucedido.

Segun e señora, e conocido Calbas a busca nan problema mas biaha. Awor gewoon asina e ta bolbe causa problema. Calbas tin boca grandi ora cu e ta den e gang. Su so e no ta mata ni un musca. Polis a scucha y haci anotacion. Nan lo busca drechi di Calbas cu su gang cu ta core cu un pickup L200 Mitsubishi. E pickup tabata yen di hoben y den nan Calbas.