Cai Cai Williams ya ta un leyenda pa loke ta trata e mundo di baseball na Aruba y tin hopi merito riba su nomber.
No solamente e ta vicepresidente di Marlboro Sport Club, pero e ta miembro tambe di Stichting Don Elias Mansur Ballpark. Y e tin un preocupacion. Preocupacion cu e coachnan no ta ricibiendo e trato adecua.
E ta splica cu nan, esta e coachnan, a yam’e y a informe cu nan a bin haya un borchi poni pa e stichting, cu nan no por subi riba veld unda cu nan no por train. Esey a tende fo’i siman pasa. A presenta despues di basta dia, a cuminsa informa su mes. E ta haya e manera aki no ta e manera pa trata hende. Vooral hendenan cu hopi aña a dedica nan tempo, entre otro Cai Cai mes, na yiu di otro hende.
E tereno en cuestion ta for di hopi aña a piki baranca te cu el a bira un stadion, door di nan propio merito. Loke e ekipo a haci den su 62 aña di existencia, e merito ey a duna e stadion aki.
Esaki no ta e manera pa trata hende. Ta traha cu hende, ta traha cu yiu di hende, ta haci cosnan boluntario.
Ta un hecho cu ta molestia Cai Cai, mirando cu e ta bin di un bario dificil. E ta mira problema y ta lanta den dje tur dia. Esey ta su motivacion cu ta tene pa haci loke e ta haci. E no tin yiu mas cu ta hunga baseball. E por a djis haci otro cos. E ta den baseball, pasobra e ta stima e deporte y e trato duna, no ta husto.
P’esey Cai Cai ta sostene e organisacion algun aña pasa, unda cu el a pasa den e mesun martirio pa e tereno unda cu na 1975 a start cu ne. Ta gradici na e sponsor y tambe na e famianan di e sponsor, unda cu ta aprecia nan te ainda. Pero e trato duna, no ta sirbi si.
Tin sigur awor aki liga menor cu 50 pa 60 mucha cu ta kita fo’i caya y ta trece nan riba veld y nan no ta gana ningun cen cu ne. Y p’esey e hecho cu cada biaha no por subi riba veld, ta molestia Cai Cai.
E tereno aki, for di dia cu a hay’e na 1975, e tabata destina pa deporte y e deporte ta baseball. Nada otro, e ta enfatisa. E ta para den statuto y tambe acuerdo di huur. Y ta deporte ta haci ey riba. No ta haci nada malo riba e veld.
Tin un veld di Little League, caminda cu ta roga pa haya e veld aki pa por haci mas cos pa e muchanan di bario, pero no ta hayando oido.
Ora cu a bandona e veld di Marlboro, a sigui traha riba e veld aki y Cai Cai ta un di nan. A mantene e tereno. El a traha mas cu trinta aña ariba sin gana un cen. E tipo di cosnan aki no mag pasa mas.
Tin cu mira rond kico ta pasa y por tuma nota cu hubentud ta den problema serio, tur mucha jong tin gana di haci cosnan robes. Kier pone nan riba e bon caminda, y nan, como veterano ta hala nan un banda. Ni ki negoshi cu por ta, ni cuanto cen e por trece. Tin otro manera pa traha pa e cos ki, e ta enfatisa.
Mester regla e asunto aki “for once and for all” y tin cu wak kico por sali fo’i dje. Cos no por sigui asina.
Supuestamente resto di e miembronan di e stichting kier saca algun miembro afo, incluyendo Cai Cai.
Segun e veterano, e supuesto miembronan a cera e veld bao di e capa cu nan kier drech’e. Y si ta pa drecha, e ora Cai Cai ta di acuerdo cu esaki. Pero pa no bay haci negoshi cu ne.
Loke cu Cai Cai kier ta pa nan informa nan directamente kico ta bay sosode cu e veld, y pa e no haya sa via via.
