CAft: Gobierno ta sigui hisa gastonan di personal

Na final di October 2018, College Aruba financieel toezicht (CAft) a ricibi e concepto di e Presupuesto di Gobierno di Aruba pa aña 2019 cu un peticion special pa duna un conseho riba e cambionan proponi den dje. Sinembargo, CAft ta probecha mesora pa hala atencion di Gobierno di Aruba cu den e Najaarsnota 2018 a acorda algun punto masha importante mes y cu te awor aki, Gobierno di Aruba no a cumpli cune. Na luna di juni ultimo a pone esaki na atencion di Gobierno, specialmente relaciona cu e Beleidsplan Verlaging Personeelskosten y e promesa di Aruba di implementa e plan aki mesora. Ta dor di e mesun promesa aki e tempo ey a aproba e plan.

CAft a corda Gobierno cu durante nan ultimo bishita na Aruba, dia 19 di october ultimo, atrobe a corda Gobierno riba e promesa haci. Es mas, a inclui e punto aki den e kernpuntenbrief di dia 24 di october ultimo, den cual debidamente CAft a laga sa di ta wardando riba e implementacion menciona.

Loader Loading...
EAD Logo Taking too long?

Reload Reload document
| Open Open in new tab

Download [133.00 B]

Den su carta di dia 8 di november ultimo, CAft a subraya cu e Presupuesto 2019 di Gobierno di Aruba no ta tene cuenta cu algun acuerdo hopi importante haci. Ta sinti cu e presupuesto aki no ta aporta na alcansa un maneho financiero sostenibel di Gobierno, specialmente si tene cuenta cu a aumenta e gastonan di personal y no ta uza entradanan incidental pa baha e debe di Gobierno. Es mas, CAft ta convenci cu den e presupuesto presenta, no ta mira ningun sorto di medidanan structura pa baha gastonan di Gobierno.

Al contrario, den bes di mira un reduccion structura den gastonan di empleado, manera acorda entre CAft y Gobierno di Aruba y cu ta hopi necesario pa logra un finansas publico sostenibel, ta nota cu a hisa e gastonan di personal mas ainda den e presupuesto presenta.

CAft ta sigui bisa cu Gobierno ta uza entradanan incidental pa cubri gastonan “tegenvallers”, aunke hopi biaha structura den presupuesto. Tambe CAft a constata cu ta uzando un suma cuantioso di placa den e presupuesto  di otro aña den e asina yama Intern Begrotingsfonds Sociaal Crisisplan. Di e forma aki ta uza placa cu de facto mester bay na baha debe di Gobierno, pa otro motibonan. CAft ta haya asina cu Gobierno no ta cumpli cu e acuerdo haci cu nan y cu Parlamento di Aruba.

Na final, Presidente di CAft, Prof. Dr. R. Gradus, ta skibri cu un reduccion structura di e gastonan di operacion di Gobierno ta necesario pa por realisa e ambicion di futuro pa cumpli cu normanan presupuestario. CAft ta subraya e necesidad pa, riba termino hopi cortico, pa tuma medidanan pa baha e gastonan structura di Gobierno.