College Financieel Toezicht (CAft) di Aruba dia 25 di februari ultimo a manda un carta pa Minister di Finanza Xiomara Ruiz Maduro, den cual nan ta reacciona riba e di cuater raportahe riba ehecucion di presupuesto di aña 2018. Den e carta di 7 pagina por a lesa den e parti di prestamonan unda ta indica cu Gobierno a cera un fiansa na final di 2018 na un interes di mas cu un porciento (1%) mas halto cu na aña 2017. Esaki lo tin su consecuencia riba e debe di Aruba pasobra e quota pa paga bek ta mas halto.
E necesidad financiero den 2018, CFT ta splica, tabata 487 miyon florin. E suma di placa aki tabata necesario supuestamente pa financia e deficit presupuestario 2018 cu tabata 149.9 miyon florin y refinanciamento di e asina yama “aflopende leningen” cu ta 337.2 miyon florin. Segun e datonan ricibi, na tur a presta den aña 2018 un suma di 154 miyon y 333 miyon respectivamente di institutonan local y internacionalmente.
Den e analisis di CFT, e deficit financiero di pais Aruba, manera describi den e di cuater relato, ta suma 130.5 miyon florin. Loke a constata tambe ta cu a presta 19.4 miyon florin mas di loke tabata necesario pa cubri e deficit financiero. CAft pa e motibo aki ta conseha cu den un eventual surplus den e cuentanan anual di aña 2018, uza esaki pa baha e debe di pais Aruba.
Tambe a constata cu den e di cuater kwartaal tin tres prestamo haci pa en total 162 miyon florin. Dos di esakinan a wordo haci localmente por medio di “staatobligatie” pa un suma di 10 miyon florin. Nan tin un duracion di 5 aña y na interes di 4.00 % y otro 44 miyon florin (6 aña di duracion cu un interes di 4.25%. E di tres prestamo haci den e di cuater kwartaal ta uno pa cual a bay riba mercado internacional y tabata trata di un suma di 60 miyon dollar (108 miyon florin) cu un duracion di 10 aña y interes di 5.75%.
CAft ta señala cu si mira bon, e interes averahe di prestamonan haci den aña 2018 tabata casi 5.9% compara cu e interes averahe di 4.2% na aña 2017. “Basta mas halto,” CAft ta indica.
Resumiendo, CAft ta skirbi den su carta cu e prestamonan local a baha 72 miyon florin mientras cu esunnan di exterior a subi cu 222 miyon florin. E saldo na final di 2018 pa loke ta e prestamonan via di “schatkistpromessen” a subi cu 42 miyon te na 115 miyon y e debenan cortico a baha cu 88 miyon florin te na un suma di 91.4 miyon.
E debe total pa final di 2018 tabata 4.298.8 miyon y a subi por lo tanto cu 103.6 miyon den 2018. E aumento di e debe, segun CAft, cu 103.6 miyon florin ta resultado di un deficit financiero (+ AWG 149,9 miljoen) mas e aumento di e “schuldpromessen” (+ 42 miyon) y reduccion di e debenan di corto duracion (- 88 miyon).
Saliendo for di e ultimo calculacionnan di e Producto Bruto Nacional di AWG 4.931 miyon (CBA, october 2018) e quota di debe, pa final di 2018, ta na 85.9%. E debe den 2018 a baha cu 0.4%.
