E concepto di ley di Minister Otmar Oduber pa regla “exclusividad y fondonan pa Serlimar”, conoci como e “regeling exclusief recht en bestemmingsheffing Serlimar” ta contene un obligacion pa tur instancia registra na Camara di Comercio paga un impuesto adicional di 300 florin pa aña destina pa Serlimar. E impuesto adicional aki ta independiente di e servicio duna door di Serlimar y tambe ta independiente di e cantidad di instancia registra na un adres.
Como tal, un instancia cu actualmente tin por ehempel 3 registracion na Camara di Comercia na e mesun adres lo haye cu un impuesto adicional di 900 florin pa aña destina pa Serlimar sin cu Serlimar lo mester a lanta un dede pa duna servicio na e adres aki. E impuesto aki dirigi riba tur instancia inscribi na Camara di Comercio ta curioso mirando cu den nos mercado mayoria negoshi y instancia den sector priva ta haci uzo di otro compania cu Serlimar pa piki nan sushi.
Un otro consecuencia di e cambio di ley cu Minister a propone na Parlamento ta cu un negoshi of instancia registra na un adres di un cas di famia, lo haye ta paga e 210 florin cu cada cas mester paga, mas e suma pa ta registra na Camara di Comercio di 300 florin, dus den e caso aki un total di 510 florin adicional pa aña destina pa Serlimar sin cu Serlimar mester a piki sushi of duna servicio na e adres aki.
Ta asina cu den e ley aki e cobranza pa piki sushi pa cas y negoshi, e asina yama “ophaalvergoeding” ta wordo cobra separa di tur esaki. E concepto di ley lo sigura cu Serlimar ta haya fondonan den exceso di 48 miyon florin pa aña reparti entre e impuesto pa cada cas, e impuesto pa cada instancia y negoshi, e impuesto riba cada estadia di turista, e fondonan cu ta bin pa Serlimar for di presupuesto di Gobierno y locual e lo cobra pa piki sushi.
Unicamente di instancianan registra na Camara di Comercio, Serlimar ta premira di ricibi Afl. 4,2 miyon florin pa aña. E suma aki ta mas halto cu e entrada completo di Camara di Comercio den aña 2017, unda Kamer a genera 2,9 miyon florin.
