E aña aki e Team di Resfuerso y e Brigada di Cacho, BOT-K9, di KIA ta e anfitrion di e entrenamento internacional “High Risk Deployment K9 Training Week” for di 1 te cu 4 di april 2019.
Esaki ta bira e di cuater aña consecutivo cu Aruba ta organisa e evento internacional aki. Participantenan ta procedente di Hulanda, Australia, Sint Maarten y Aruba.
Di dialuna 1 di april te cu diabierna 4 di april Aruba ta bay ta e centro di entrenamento varia. Durante e periodo aki intercambio di conocemento, experiencia y trahamento den team ta bay ta central. Entrenamento lo ta tanto den awa como riba tera. Tambe lo bini cu situacionnan unda mester subi na halto y baha di halto bay abou. Fuera di esey lo crea situacionnan di dificultad unda aresto ta cay. Tur esaki ta conduci na un siman di entrenamento intenso, cu su debido reto pa tanto e cachonan como nan lider. Ademas di esaki, lo duna informacion con ta trata cu cacho den e diferente tipo di riesgo relaciona cu salud di e cacho dependiendo di e clima unda e ta haya su mes. Por ehempel con ta trata cu un cacho ora e haya un zonnesteek.
Pa habri e siman di entrenamento, Aruba su BOT-K9 lo duna un presentacion durante e Dog Show 2019 na Rancho Villa Floralina diasabra dia 30 di maart 2019 pa 6’or di atardi.
Aruba su BOT-K9 ta brinda sosten specialisa na KIA y otro partner den ramo di seguridad tanto local como internacional. Regularmente e grupo aki ta entrena cu diferente unidad di islanan den Caribe, entre nan di St. Maarten, como tambe cu otro unidadnan renombra manera Army Rangers di Merca y Dienst Speciale Interventie (DSI) di Hulanda. Aruba por ta orguyoso di su team BOT-K9 ya cu internacionalmente nan ta gosa di prestigio y ta bon recomenda.
