No ta prome ni di dos, sino ta di tres biaha e aña aki so cu cachonan brabo den e bario di Rooi Master. E criado di bestia Demetrio “Ocando” Wever ta hopi disgusta, fada y desiluciona, pasobra el a bay Polis dos biaha pero sin ningun resultado. Awe a conta mas o menos tres carne morto, banda di casi 10 carne herida. Algun di nan ta seriamente herida, incluyendo pia kita afo. Cu e susesido awe, Ocando a adverti bisiñanan cu e lo pone veneno tur rond di su cura pa e por cria su bestianan. E cachonan cu yega cerca, lo tin consecuencia!
Demetrio “Ocando” Wever ta biba dos cas eybanda mes na Rooi Master. E tin 43 aña di edad pero for di su 15 aña di edad caba e tabata cria bestia cu su welo y su tata. Criamento di bestia ta un tradicion di su famia. Nan ta criando cabrito, carne, porco y galiña.
Cada carne bendi, dependiendo peso, ta produci mas o menos 350 florin. Cu e susedido di awe a perde basta placa, cu ningun hende ta cubri. Aunke cu Ocando tin un bon idea di cua cacho ta reaponsabel, toch den pasado nunca e famianan a responsabilisa pa e daño financiero.
Na final e criado di bestia ta insisti cu bisiñanan mester tene nan cacho den nan cura di cas. E no lo tolera mas di e acto aki, esta di cachonan brabo cu ta drenta pa mata of lastima su carnenan.
