Awe mainta algo despues di 10:00am a activa autoridadnan pa brinda asistencia na un chauffeur sinta den su auto cu a bira victima di un atake di un cacho brabo. E tabata banda di NAPA riba e caminda grandi di Santa Cruz ora diripiente 1 of 2 cacho a bini riba e auto y bula riba porta di e auto, hinca cabes den bentana y morde e chauffeur na su man.
E chauffeur a pasa den un tremendo susto pero a logra core cu e cachonan. Mester menciona cu ambos cacho a core bay drumi bou di algun auto cerca di e edificio di NAPA. Ta comosifuera nan sa kico nan a haci y ta purba sconde pa no gara nan!
Ya den pasado varios biaha e cachonan a ataca hende cu ta cana eybanda of scooter cu pasa eybanda y hasta clientenan cu ta baha pa cumpra na NAPA. E mes tambe varios biaha e cachonan a bula riba su auto, pero e no a spera cu e biaha aki, sinta den su auto, cu e ta haya mordi di cacho. Riba porta di e auto por mira rasca di e huñanan di cacho y hasta na rand di porta por nota marca di mordi di e cacho.
Ta trata aki di un situacion masha fastioso, cu diariamente ta causa molester pa e bario, pa trahadonan y clientenan di NAPA. Polis a compila tur dato y lo traha un rapport riba e sucedido. A conseha e victima pa e bay Spoedeisende Hulp na Hospital pa ricibi cuido medico y hangua contra tetanus.
