Bushiri lo bira e cas di Aruba Beach Tennis Open

Aruba Beach Tennis Open, cu ta planea pa tuma luga den e siman di dia 11 pa 18 di November, a muda definitivamente for di Eagle beach na e tereno rond di ex Bushiri Hotel.

E minister encarga cu infrastructura a menciona cu tin acuerdonan haci for di aña pasa cu e aña aki nan lo muda bay Bushiri. Naturalmente tin cierto trabaonan cu tin cu haci pa asina por acomoda nan y Gobierno ta dispuesto pa haci lo posibel pa laga e luga cla.

E organisador di e torneo, Sjoerd de Vries a menciona den medionan local siman pasa cu Eagle Beach ta e unico luga adecua pa Aruba Beach Tennis Open. E luga proponi pa gobierno, unda antes tabata Bushiri Hotel, no tabta cla, di manera cu patrocinadornan comercial di e torneo, tabata wardando riba e confirmacion, cu e torneo lo continua.

E minister en cuestion a laga sa ya caba prome cu e siguiente edicion di e torneo, cu 2018 lo tabata e ultimo aña cu e torneo lo a tuma luga riba e beach di Eagle Beach, despues cu no a mantene na palabracionnan na 2017. Aparentemente e organisacion lo a permiti pa laga vehiculonan subi riba e beach.

E mandatario a indica cu a mustra nan cu nan no a mantene riba e condicionnan di e precario-vergunning y nan a reconoce esaki tambe. Segun e mandatario lo tin papia aki di un mal comunicacion, pero cu awo nan lo bay cuminsa di nobo. Loke ta sigui ta cu e organisacion di Aruba Beach Tennis Open, lo bay sinta na mesa cu DOW y DIP pa asina mira con nan lo rehabilita e tereno di ex Bushiri Hotel, pa asina por establece e torneo. No solamente pa e aña aki so, sino pa hopi otro evento den futuro.