Diamars merdia un unidad di Warda nos Costa a sali pa busca trahadonan di construccion sin un permiso valido di trabou y/of estadia. A bishita e proyecto di vivienda y oficina bou construccion na Wayaca, net patras di CITGO Wayaca. Ey a topa cu varios trahado, mayoria di nacionalidad Venezolano, cu no por a mustra nan carnet di permiso emiti dor di DIMAS.
Di acuerdo cu e maneho di custumber, Warda nos Costa tin e autoridad pa efectua control na negoshinan of areanan publico, pidiendo stranheronan pa demostra un permiso di estadia y di trabou legal riba nos isla. Casnan di hende no por drenta pa controla permiso, contal cu tin un orden di Hues pa haci esey. Pero riba caya of den negoshi si ta posibel.
Parce cu riba 10 persona a bay oficina di Warda nos Costa pa controla den e sistema si nan tin permiso, si nan a pidi un permiso caba y/of pa check desde ki dia nan a drenta Aruba como turista y a opta pa keda aki despues di e dianan otorga. Ta un hecho cu hopi biaha e personanan aki ta bin como turista y ta pidi extension di nan estadia te cu 90 dia, o sea 3 luna, na Aruba. Den e periodo ey nan ta traha, loke ta haci cu nan tin un permiso di estadia pero no un permiso di trabou.
Den casonan asina Warda nos Costa ta opta pa detene un persona asina y deport’e di Aruba pasobra ta burla di nos leynan y ta stroba otro hende cu un permiso of un local pa haya trabou. E miho forma ta pa pidi un permiso di trabou, prome cu cuminsa traha den forma ilegal.
