Ayera un ekipo special di Polis a cuminsa cu un investigacion riguroso riba un pistool horta di un colega Polis. Con por a horta e arma reglamentario ainda no ta bon conoci, pero ta indica cu nan a horta su arma di candela for di su auto personal. E investigacion awor ta pa yega na e arma aki mas pronto posibel.
A base di e investigacion andando, a drenta diferente cas for di atardi caba, cu presencia di Fiscal y Hues Comisario. Parce cu den un cas na Paradera, a topa cu un arma pisa, cu a sorprende e ekipo di Polisnan haciendo e investigacion. Ta trata aki di un arma semi automatico cu ta parce un UZI, cu un silenciador, 3 peña y municion. E tipo di armanan asina y cu silenciador su dilanti mas bien ta wordo uza pa sicarionan profesional. Tambe como cu a haya e arma cu tres peña carga, ta indica cu e grupo aki ta cla y dispuesto atrobe pa atraco y asesinatonan plania.
E homber cu ta biba na e cas aki, di fam Henricus, ta un figura hopi peligroso den baho mundo. Na luna di december el a sali for di prizon despues di a sinta un castigo di varios aña pa un serie di atraco y otro delitonan criminal pisa, cu Hues a conden’e. Ta sospecha cu e ta envolvi den e hortamento di e arma reglamentario di Polis awo.
Na tur Polis a detene no menos cu 5 sospechoso te awor y a confisca tur e armanan cu a haya na e cas. Mester menciona cu a detene Henricus riba caya y despues a bay cas di su pareha di inicial R.R. y segun informacion, ey a bin confisca e armanan pisa aki. Na otro adresnan cu a bishita for di atardi, no a nota cu a detene sospechosonan. A drenta cas na Madiki Kavel, na Ponton y otro barionan.
Na e adres na Paradera, a nota un otro figura di fam H., conoci den Dakota, cu recientemente a sali di prizon, cu tambe tabata presente na e cas. Kico su rol ta den e investigacion, no ta conoci pa nos ainda. Pero testigonan den bario a señala cu e habitantenan ey ta biba un bida di luho y abundancia, sin cu ningun ta traha. Esey riba su mes caba ta lanta e interogatorio, ta for di unda e placa ta bin?
Segun vocero di Polis, Lito Lacle: “No ta descarta mas detencion”.
