Prome Minister: Betico ta sinonimo di vision, determinacion y curashi

Prome Minister Evelyn Wever-Croes, na ocacion di celebracion di Dia di Betico na e Ceremonia Protocular riba Plaza Libertador Gilberto François “Betico Croes, a duna un discurso emocional yenando esnan presente cu un sentimento di amor y respet pa Betico Croes kende lo a cumpli 80 aña, asina e departamento di Prensa di Gobierno a skirbi.

Awe 25 di januari ta un dia hopi special, momento cu nos ta celebra oficialmente Dia di Betico riba su fecha natal. Si Betico Croes tabata na bida, awe e lo a cumpli e bunita edad di 80 aña, sinembargo nos Creador tabata tin otro plan, y a yam’e hopi tempran den Su Reino, na un edad di 48 aña.

Betico tabata un persona humilde, cu un charisma enorme. Un persona mescos cu nos tur: Tata, yiu, ruman, omo, padrino, y toch mes momento un persona special, cu a logra cosnan grandi.

Discurso di Prome Minister Wever

Awe mi kier enfoca riba e lesnan cu Betico a siña nos. Ya desde un edad hoben, el’a mustra un caracter di un Lider. Di un meneer di school a bira un politico pa despues comberti su mes den E politico di mas grandi cu Aruba a conoce den su historia, cargando e nomber tambe di Nos Libertador. Betico a demostra cu esaki, cu si bo tin un VISION y DETERMINACION, no ta importa cuanto obstaculo, bo por surpasa nan.

Na e momentonan aki den historia di nos pais, nos pais ta enfrentando retonan grandi. Retonan financiero, retonan den gobernacion, retonan social, retonan cu pais bisiña.

Pero nos tin e VISION y sigur e DETERMINACION pa surpasa e retonan aki. Ban laga e memoria y e lucha di Betico inspira nos, den e lucha pa bienestar pa cada cuidadano di nos pais.

Betico a demostra tambe e importancia di UNION. El’a sa di uni nos pueblo den e lucha pa Status Aparte. E tempo ey, para dilanti retonan imenso, cu ciere di e refineria, e UNION di nos pueblo, guia pa un gran lider, a marca e diferencia.

Su palabranan tabata : “Arubiano no ta solamente esun cu a nace na Aruba, sino tambe esun cu a haci Aruba su nacion.” Y mi ta concuri completamente cu esaki.

Awor nos ta para dilanti retonan similar, y mi ta convensi cu den UNION nos lo enfrenta y surpasa esakinan.

Betico a demostra CURASHI. Curashi no kiermen cu bo no tin miedo. Curashi ta ora bo ta tuma e decision di haci lo corecto, apesar cu bo tin e temor! Betico tabata sa cu e Status Aparte tabata lo corecto, y apesar di temornan, a sigui cu e lucha. Esey ta CURASHI. E situacion actual ta similar. Mirando cuanto desaroyo nos pais ta pasando aden, pero no laga esey stroba nos. Ban demostra CURASHI pa enfrenta tur reto, y surpasa nan.

Esaki ta apenas algun di e virtudnan di Betico cu mi kier a repasa awe mainta:

VISION y DETERMINACION, UNION y CURASHI.

Ta hopi importante ta pa nos mantene su memoria bibo y traspasa e historia real di su bida y su lucha pa nos futuro generacionnan. Pa garantisa esaki, nos gobierno ta comprometi pa graba e historia aki, y inclui esaki den curriculum na scolnan, cu e meta pa presevera y inspira nos comunidad. Pa asina no tin discusion riba e parti importante aki di nos historia. E memoria di Betico Croes mester ta eleva riba tur partidonan politico, riba tur gobierno. E memoria di Betico Croes ta partimonio nacional, y nos mester preserve.

Un pueblo cu lubida su historia of un pueblo cu no conoce su historia, ta un pueblo sin futuro. Especialmente den e temponan aki cu nos ta enfocando hopi riba innovacion na Aruba, e vision pa futuro ta asina importante, y pesey e compromiso di nos gobierno, pa nos historia nunca bay perdi.

Entre e logronan grandi di Betico, of cu Betico a contribui na nan grandemente ta nos Himno y nos Bandera, simbolonan di union y identidad di un pais. Tambe e hecho cu awe Aruba tin su propio gobierno, su propio ministernan, su propio Parlamento, su propio moneda. Y tur esaki a inculca e sentimento di orguyo den nos Arubianonan.

Como sobrina di Betico, nunca mi a pensa di lo drenta politica y sigur mi no por a imaginami cu un dia, den calidad di Prome Minister di Aruba, mi lo mester dirigi mi mes durante un ocasion asina special na henter pueblo di Aruba. E ta yena mi cu un sentimento profundo di orguyo. Orguyo di a gara e bandera, y sigui cu e lucha.

Laga nos reflexiona awe riba un dia hopi special, recordando Betico Croes como e luchador incansable kende a sacrifica asina tanto di su bida pa logra cumpli cu e deseo di su pueblo. Laga esaki ta un estimulo y sirbi como ehempel pa henter nos comunidad.

Cu e ehempel di betico inspira nos tur dia: “Si Bo kier logra algo grandi den bida, bo mester haci sacrificio y traha duro p’e”.

Mi ta haci un suplica na cada un di boso pa ban sigui su ehempel. Traha duro. Sin temor pa sacrificio. Lucha cu integridad y honestidad pa hiba nos pais padilanti.

Como pais nos ta enfrentando retonan hopi grandi na e momentonan aki, pero e dia manera awe, esta Dia di Betico ta brinda nos e  oportunidad pa refleha, yenando nos cu inspiracion, balentia, curashi, inteligencia y amor patrio pa atende cu tur reto pa garantisa felicidad di e pueblo aki, locual Betico semper a anhela.   

Mi kier a expresa den nomber di Gobierno di Aruba un palabra di DANKI na henter su famia kendenan semper a sostene. Especialmente su yiunan, Guisette, Glenbert, Junior, Glendeline. DANKI . DANKI pa a comparti boso tata cu nos pueblo. DANKI pa compronde cu Betico no tabata un tata pa un hogar so di mama, tata y cuater yiu, sino un tata pa henter Aruba. Y apesar cu un dia manera awe, no ta facil pa boso, apesar cu riba un dia manera awe, lo boso a desea di por canta “E fecha glorioso” pa boso tata, boso por ta sigur cu henter e pueblo di Aruba ta sumamente agradesido pa locual cu Betico a nifica pa Aruba. Ohala cu esey ta un consuelo pa boso”.

Prome Minister Evelyn Wever-Croes a termina su discurso gradiciendo esnan presente pa nan atencion deseando tur un feliz Dia di Betico. Pabien Aruba!