Buki tocante Maternidad den 4 idioma cu pintura di Gustave Nouel

145

Durante henter su embaraso y net despues di nacemento di su yiu muhe Lilian na 2015, modelo y actriz Zuleika Coffie a pose pa un serie di 34 pintura ‘Maternidad’ di pintor profesional Gustave Nouel.

Na 2015 y 2016 diferente exposicion y actividadnan artistico y di modelahe a tuma lugar na Apeldoorn, Rotterdam y Amsterdam rond di e tema aki. Ramon Todd Dandaré, cu tabata na un di e exposicionnan, a lansa e idea pa traha un buki di e pinturanan di Gustave y e textonan personal di Zuleika cu tabata colga bou di cada pintura.

Di soño pa realidad

Pa por haci e buki posibel, e dos artistanan profesional Arubiano a uni cu diferente persona cu mente creativo y dinamico pa purba realisa nan soño. E resultado lo mester tabata pa e bira un buki, no solamente den cual amor di mama intemporal y e experiencia di e muhe na estado (y e mama reciente) ta ser refleha den imagen y palabra, sino tambe un buki den e cuater idiomanan mas papia na Aruba (esta Papiamento, Hulandes, Ingles y Spaño).

“Ademas di ta cuartilingual e buki, cu ta un oda na maternidad universal, tambe tin e aspiracion pa crea un brug entre e parti Europeo y Caribense di Reino Hulandes y entre nan y resto di mundo, den e sentido artistico di e palabra”, segun Nouel.

A base di e texto original di Zuleika Coffie, Gustave Nouel y Helena Frances a cuminsa cu e preparacionnan pa e buki cu e titulo: ‘Maternidad’ di soño pa realidad den imagen y palabra (‘Moederschap’ van droom tot werkelijkheid in beeld en woord, ‘Maternity’ from dream to reality in images and words, ‘Maternidad’ de sueño a realidad en imágenes y palabras).
E texto Hulandes a ser revisa pa e escritor Benne Solinger y e traductor Fred de Haas. E texto na Ingles a ser revisa pa Maureen Berkel. E textonan na Papiamento y Spaño a ser revisa pa Ramon Todd Dandaré, kende, ademas di ta e motor tras realisacion di e buki, a tuma encargo di e revision final.

E talentoso joven poeta Rosabelle Illes tabata dispuesto pa skirbi e prologo y ta constata cu: “Fragmentando honestidad den simpel narativa, Zuleika ta haci e acto di comparti mustra natural…”.

Quito Nicolaas, escritor y critico literario ta culmina riba e kaft patras cu: “E buki Maternidad ta refleha un biahe interior den e bida emocional di un hende muhe na estado. (…)  E pintura- y poesianan ta representa e momentonan y e cambionan cu un hende muhe ta experencia, como tambe e interaccion entre naturalesa y individuo (…)”.

A aserca e diseñado grafico Steffen Maas pa profesionalisa e buki, mientras cu LM Publishers tabata tin e produccion na su encargo.

E publicacion a bira posibel danki na sosten di: Union di Organisacionnan Cultural Aruba (UNOCA), Vertegenwoordiging van Nederland in Aruba (VNO), Servicio di Telecomunicacion di Aruba (SETAR N.V.), Fundacion Cas pa Comunidad Arubano (FCCA) y Fundacion Corector di Papiamento (FCP).


Buki ‘Maternidad’ di soño pa realidad den imagen y palabra (‘Moederschap’ van droom tot werkelijkheid in beeld en woord, ‘Maternity’ from dream to reality in images and words, ‘Maternidad’ de sueño a realidad en imágenes y palabras) – Gustave Nouel & Zuleika Coffie. ISBN: 9789460225260.
Idioma: Papiamento, Hulandes, Ingles y Spaño. Cantidad di pagina: 96. Encuaderna

Na Hulanda e buki ta obtenibel na e.o. LM Publishers (https://lmpublishers.nl/catalogus/moederschap/).

Na Aruba e buki ta na benta den un edicion limita na e librerianan.
Pa mas informacion por tuma contacto cu: Ramon Todd Dandaré na [email protected]