Desde comienso di su trayectoria musical Jossy a impresiona publico pa su bos fenomenal. Kisas esey tabata e motibo cu na aña 1957 difunto Addison Croes a dicidi pa introduci Jossy Brokke Jr. cu su nomber completo, e prome biaha cu el a presenta e hoben cantante durante su programa dominical ‘Buscando Talento Artistico’ na Voz di Aruba. Jossy, como mucha chikito, tabata para riba un stoel y señor Lee Franken a acompañ’e cu guitara cu e cancion La Cama de Piedra. E manera con Addison Croes a introduci Jossy e tempo ey tabata totalmente apropia pa un hoben cu awendia ta un di nos cantante- y compositornan mas renombra, cu un trayectoria hopi amplio den mundo farandulero durante e ultimo 60 añanan di su bida. E hoben cantante a impresiona comunidad hopi pa su talento, aunke e no a drenta mundo artistico mesora como solista.
Jossy Brokke Jr. a forma parti di e grupo Los Casinos di 1960 te 1961. Na 1962 el a join Camilo ‘Milo’ Muyale, kende tabata toca harpa den e grupo Los Caciques. Den e grupo aki el a hasta representa Aruba durante un convencion internacional ASTA na Las Vegas, Nevada.
Su carera artistico na Aruba a keda interumpi pa un aña pa motibo di cambio di stem y pa e hecho cu e aña ey Jossy su tata a bay biba na Hulanda cu henter famia. E tempo ey empleado publico di Aruba tabata haya e asina yama buitenlands verlof di varios luna.
Sinembargo, Aruba a sigui atrae Jossy Brokke Jr., kende a bolbe su isla pa tuma rienda di su carera musical. Director suplente, Angel Kirchner di Telearuba e tempo ey, a haci e prome grabacion di Jossy Brokke Jr. cu a tuma luga na Telearuba na 1967. Despues a graba un disco 45 RPM bou di e seyo C.A.M. A logra bende mas di 5 mil disco No me dejes, un cantidad sumamente grandi pa e tempo ey. E siguiente exito di Jossy Brokke Jr. tabata Dicen Mis Amigos, riba su di dos disco. Cu esakinan Jossy a logra e posicion maximo na tur radio, tanto na Aruba como na Corsou y Boneiro. Su prome longplay (LP) el a graba na Volendam, Hulanda, den studio di e grupo mundialmente conoci The Cats.
Varios artista ta scoge pa un nomber artistico cortico den mundo musical. Sinembargo, un di e cantantenan prominente di nos pais ta conoci pa su nomber completo. E rason di esaki ta kisas cu comunidad ta reconoce cu su prestacion musical ta nada otro cu …..completo.
Como integrante di un banda of como solista, Jossy Brokke Jr. a presenta varios caminda pa publico grandi y chikito. Hopi biaha e cantante tabata invita na fiesta- of ceremonianan cerca Gobernador. Asina Jossy a entretene Su Mahestad La Reina Juliana y su yiunan na Aruba y Corsou.
E titulo como cantante y compositor di canta-autor ta referi na un persona cu no solamente ta canta, pero cu tambe ta skirbi su mesun canticanan. Jossy Brokke Jr. a specialisa su mes den e genero aki y a bira un di e cantante- y compositornan masha aprecia di Aruba y Antia.
Diferente artista di taya di Corsou y Aruba a graba su canticanan. Jossy Brokke Jr. tabata e prome artista Arubiano cu a participa na un festival internacional cu tabata e Festival OTI (Organización de Televisión Iberoamericana) na Acapulco, Mexico, na 1976. Tambe Jossy ta e prome Arubiano cu a representa Antia Hulandes na Festival Sur Americano del Caribe na Coro, Venezuela. Ademas el a participa na Festival de La Canción de Puerto Rico, Festival de La Canción na Managua, Nicaragua y Festival Voz Di Oro.
No tabata un sorpresa cu Jossy Brokke Jr. tabata ganado na varios di e festivalnan aki. Jossy tabata ganado absoluto di e segundo Festival Papiamento na 1968 cu su cancion ‘Maria mi Mama’. Hulanda a keda atrae Jossy Brokke Jr. y na aña 1978 el a bolbe bay biba na Hulanda, unda el a amplia su repertorio pa presenta su mes como cantante rond Hulanda. Via Hulanda el a kibra frontera den Europa.
Na aña 1996 e cantante Arubiano, kende ta reconoci como un di e grandinan di nos pais, a graba un disco compacto titula ‘Cancionnan di mi bida’. Esaki tabata refleha e trayectorio di e artista. Un disco cu a gana curason di e publico cu semper a admira Jossy, pero tambe e hobennan cu a siña aprecia e talento di e gran cantante aki. Jossy a culmina su ‘celebracion di oro’ cu produccion di un dobel CD na 2009, cu cancionnan sumamente bunita. E disco compacto ta titula ‘Jossy Brokke y Camilo Muyale’. E otro disco compacto ‘Jossy Brokke celebrando 50 Aña den Farandula’ ta un grandioso obra di un caliber halto y ta contene 14 cancion. Na 2018 Jossy Brokke Jr. a cuminsa traha riba un produccion nobo atrobe, na ocasion di su di 60 aña den farandula.
Den e buki BaluArte por lesa mas di nos baluartenan cultural di nos pais. Tur esnan interesa den e buki BaluArte por pasa buki na Plaza Bookshop, Van Dorp y De Wit Stores na San Nicolaas y Oranjestad. E prijs di e buki ta 55 florin.
