Santana ta e lugar di ultimo sosiego di mayoria di nos sernan keri cu a bay prome cu nos y mester ta un lugar hopi respeta, pero na Aruba ultimamente no tin respet mas pa defunto. Santana di Paradera constantemente ta e lugar unda ta pasa tira bruheria y bestia sacrifica. E fiel creyente di Santeria, bruheria of ritual satanico ta tira e saconan aki den e cura di Santana, nan ta cay riba grafnan cerca di e cura of banda di e grafnan, pero tin ora nan ta hera y e saconan ta keda tira canto di caminda pazuid di santana. E biaha aki a bin topa no cu un pero cu 3 saco cu sacrificio di varios bestia (galiña) y tambe cu contenidonan parecido na bruheria, santeria of ritual satanico den cura di Santana.
Paradera: Diabierna den oranan di merdia, mientras un cabayero a bay bishita graf di su famia na Santana di Paradera, un holo hopi desagradabel di bestia morto a hala su atencion. Un cacho cu tabata canando su so den santana tabata bay cada rato den e skina bandi pazuid. E cabayero a dicidi di bay wak kiko tin eybanda y pa su sorpresa a descubri tres saco di cual un saco di sushi grandi, nan tabata cera y tabata sacando un holor hopi desagradabel mes.
No ta prome biaha cu tin cosnan straño ta sosode den santananan na Aruba. Algun tempo atras na santana di Zeewijk y Sabana Basora desconocidonan tabata kibra graf of keldernan y nan tabata horta e carpachinan. Na Santana di Noord nan a saca un caha di morto for di un kelder, den cual tabata tin un persona cu no tabata tin hopi tempo dera y ainda lo tabata den estado di decomposicion. Tambe den santana di Playa, algun aña pasa como mas di 8 restonan mortal a desaparece for di nan keldernan.
Pero na e Santana di Paradera constantemente ta bin topa cu cosnan straño, algun aña pasa na graf di dos mucha hoben cu a fayece den un accidente di tragico, desconocidonan a basha sanger no ta conoci si tabata di hende of di bestia na e grafnan di e dos defuntonan aki, e sanger tabata hole hopi stinki mes. Algun siman pasa a bin topa cu varios galiña morto y varios caha di sapato mara, na e mesun forma esunnan actual. Segun un bisiña ta trata di dos muher color scur den un Toyota Rav, nan lo a yega su cas, y a puntre ” Unda e Misa den mondi ta”. E bisiña a conta cu ela contestanan ” No tin niun Misa den mondi”, e damanan a papia algo den un otro idioma y a move.
Constantemente ora bo pasa riba e caminda pazuid di santana di Paradera bo ta topa cu saconan cu galiña morto benta, canto di e caminda, tin ora e galiña ta bin acompaña cu maishi, boonchi, banana, bela etc. yen di artefactonan cu ta mustra den direccion di bruheria of Santeria.
Awe un biaha mas un bishitante di Santana ta bin topa cu 3 saco cu bestianan morto y artefactonan procedente probablemente di bruheria den nan. Den un di e saconan tabata tin un tas preto, cu dos galiña of tres galiña morto un caha di sapato cu resto di belanan y un otro bestia chikito morto, aparentemente lo ta trata di un paloma, esaki tambe tabata cubri cu muskita.
Den e saco di sushi preto tabata tin tres bestia parecido na tres gai of calacuna, nan tabata demasiado grandi pa ta djes 3 galiña. Den e saco aki tabata tin varios paña tambe, tabata tin jockey di hende grandi y te hasta varios paña di mucha, size basta chikito den e saco aki. Cualke persona lo por reconoce nan pañanan.
E otro saco di plastic tabata hopi muha y tabata hole hopi desagradabel, den dje tabata tin algo parecido na un bala di carni y intestino, esaki tabata bon lora y cera den un saco plastic y e tabata hopi muha, esaki tabata tur na bichi, tambe den e saco tabata tin varios pida catuna grandi tur na sanger.
Polis presente no a confia esaki y a keda di manda departamento tecnico pa haci mas investigacion pa confirma cu no ta trata di un sacrificio di carni humano, por ehempel di intestino humano, un foetus of parti di un persona cu recientemente a fayece, pero di un intestino di un animal. Tabata casi imposibel pa yega cerca y mas dificil pa habri e plastic cu e supuesto e carni tabata lora den dje, e holor tabata demasiado fuerte y e tabata cubri cu bichi y muskita.
Canto di e caminda pazuid di Santana tur dia esnan cu ta kere y ta practica bruheria ta pasa laga cosnan straño atras, esaki posibelmente lo ta pasa den oranan laat di marduga. Constantemente nan ta tira galiña morto, maishi, boonchi, animalnan chikito morto cera den caha di sapato, belanan, azetanan straño basha. E ritualnan aki, of trabounan di bruheria of santeria ta birando di mas na Paradera y lo ta bon si por a pone un camara di seguridad pazuid di santana pa mira ken of kendenan ta sacrificando asina hopi bestia mayoria bes galiña pa ritualnan satanico, bruheria, santeria etc. Esaki sigur no por ta na bienestar di niun ser humano.
Un dama cu tambe tabata den e santana na momento cu a descubri e tres saconan aki, tabata hopi rabia y a comenta cu awo si ta basta cu bentamento di bruheria, ritual satanico etc. den nos Santana, e ta pidi e persona of personanan cu ta pasa tira e saconan aki den Santana, pa por fabor cuminsa respeta nos santana, paso aki ta e lugar di ultimo sosiego di su sernan keri y tambe di hopi habitante di Paradera. E dama a pidi pa e bruhonan bay otro caminda bay haci boso fechorianan no riba Aruba y mucho menos den nos bario di Paradera.
E agentenan policial cu a presenta na santana, sigur a tuma e caso aki hopi na serio, a pidi pa polis tecnico pa haci mas investigacion y tambe a keda di pasa patruya cu mas frecuencia den e area aki, paso nan lo ta desea di por topa cu e personanan cu ta cometiendo e acto baho aki y cu ta faltando respet na e santana di Paradera.
Team prensa Aruba a bay habri e saconan y e imagennan aki ta di loke a descubri den santana di Paradera.
