E siman cu a pasa tabata tin un caso caminda cu personal di Douane na Aeropuerto a haci detencion di un dama kende tabata tin basta droga pega na su curpa. E persona aki den oranan di atardi tabata subiendo avion pa asina bay Hulanda. El a bay hiba droga, pero durante trabao di personal di Douane a logra pone man riba dje prome cu a subi avion. Esey ta bay a base di tacticanan cu nan ta mira di e pasaheronan cu nan ta mira ora di subi avion, cu droga abordo. Na momento cu a bay haci e control prome cu subi avion, a resulta cu e tabata tin droga riba su curpa y a cuminsa cu un investigacion mesora. Prome cu e avion a bay, a vigila su movecionnan na aeropuerto. Tambe a cuminsa mira kende ta esnan cu e tabata tin contacto cun’e na aeropuerto. A bin saca afo cu e lo tabata tin contacto cu un persona cu ta conoci den bringamento, esta e ta un bringado di MMA. Ta trata aki di e conocido bringado di inicialnan JB. Na momento cu a mira tur e movecionnan aki y a detene e dama, a bay mesora pa tambe pa detene e bringado di MMA, un persona Arubiano. E tabata ya caba riba avion. A acerk’e den avion, personal di Douane, autoridad, hunto cu departamento di Crimen Organisa cu ta atende cu droga, a bahe for di avion. A cuminsa tambe un proceso di interogacion. E momento ey, mirando e forma cu e dama cu a wordo gara cu droga na su curpa, tabata move y expresa, a sospecha cu e persona aki lo tabata guia e courrier, cu tabata abordo. Es decir, e lo ta esun cu ta doño di e droga y na momento cu e lo yega Hulanda, e proceso ta sigui pa entrega e droga, na esunnan cu mester tum’e. Den e caso aki a bay cu tur dos warda. E MMA Fighter a keda cera sigur pa dos dia y na di dos dia, despues cu autoridad a haci full un investigacion, a bin resulta cu loke e dama tabata indica, no tabata corecto. Ningun momento e bringado di MMA, JB tabata cun’e. Parce cu nan lo a topa otro den e proceso, pero no ta cuestion cu nan tabata hunto y ningun momento nan tin un conocemento of tin amistad cu otro. Pesey mes den oranan di mainta, dos dia despues, e bringado di MMA a wordo laga den libertad. E no tin nada di haber cu e caso. E dama si a keda cera. E tin cu bay duna cuenta dilanti hues den corte.
