Diabierna 1 di juni 2018 a continua e playoff di Aruba su Futbol Division uno.
Den stadion Frans Figaroa na Noord a topa otro e actual lider di e playoff FC Porto cu den dos salida tin un total di 4 punto caminda den nan prome wega a gana di RCS, y den nan segundo compromiso a keda den un empate na dos gol contra di United.
Di otro banda e equipo di Brazil jrs ta na segundo lugar cu den nan prome wega e partido ta keda cancela, caminda nan mester a topa United, y den nan di dos wega ta gana di RCS , pa asina acumula un total di 3 punto.
Y na mes momento pero na Compleho Deportivo Franklin Bareño na Piedra Plat a tuma lugar e wega entre RCS contra di United.
Den e wega di Brazil jrs contra di FC Porto nos mester bisa cu na inicio di e wega e equipo di FC Porto a cuminsa crea algun atake riba e equipo di Brazil jrs pero e defensa a sa di controla esaki na bon manera pa asina kita tur peliger dilanti nan arco y tambe proteha nan portero.
Riba un contra atake di e equipo di Brazil jrs ta logra haja un tiro di skina, caminda cu despues di a cobra e tiro aki e bala ta dal den un defensa su man caminda cu e tabata net dilanti di e refree y no por a haci nada cu ta pita corectamente un penalty esaki tabata na minuut 9 di e partido, E Capitan di Brazil jrs cu ta Owen van der Wijne #10 ta cobra cu exito pa habri e marcador na 1-0.
Despues tabata na di 13′ di wega riba un otro tiro di skina pa Brazil jrs Randolph Werleman #5 riba un cabesaso ta pone e bala den net pa bai ariba 2-0.
Owen van der Wijne #10 ta bolbe deposita e bala den net riba un atake di e equipo di Brazil jrs na di 23′ di wega pa bai ariba comodamente cu e score di 3-0.
Den e prome 45′ nan di wega , analisando e wega nos mester bisa cu na comienso di wega e equipo di FC Porto a cuminsa crea algun espacio pero no por a habri e marcador, y di otro banda e equipo di Brazil jrs den un combinacion entre Owen van der Wijne, Brian Dorothal, Randolph Werleman, Sergio Piard y Clancy Calixte tabata mortal pa e equipo di FC Porto, nan tabata hunga un Futbol hopi alegre y tambe toke nan perfecto y rapido cu a crea bon espacio y tambe por a habri e marcador y tambe di bai ariba comodamente 3-0.
Den e segundo tempo nos mester bisa e wega a baha completamente di velocidad caminda bo por a mira claramente cu cansancio a hunga un rol, e equipo di FC Porto a sigui cu su atakenan ,na di 59′ di wega Dorbeck #11 ta los un tremendo tiro pero ta e portero ta trece salbacion caminda e ta pomp e bala mande afor.
Riba un contra atake di e equipo di Brazil jrs ta e hoben Brian Dorothal # 17 riba su camiseta ta logra score un tremendo cabesaso pa bai ariba 4-0 na di 69′ di wega.
Den un pifia di e defensa di FC Porto kier a bai pasa e bala pa su keeper y ta faya barbaramente caminda cu Samson Occean #19 ta desvia e bala pa bai lora bai den gol pa haci e wega 5-0 na di 84′ di wega.
Despues cu e equipo di FC Porto ta cai den defensa ta duna Brazil jrs espacio pa sigui crea algun bon oportunidad y ta Samson Occean #19 ta bolbe score pa haci e wega 6-0.
Den un otro atake riba un tiro for di distancia pafor di doelgebied Randolph Werleman #5 ta manda un tremendo tiro fuera di alcanse di e portero di FC Porto pa haci e wega 7-0 na di 87′ di wega.
Den tempo extra pa ser exacto 90’+2 e hoben Andy de Windt #7 ta caba di pone e cherry riba e bolo pa haci e wega 8-0.
Final di e wega Brazil Jrs vs FC Porto 8-0.
E wega a wordo dirigi pa Desiree Christiaans asisti pa V Ridderstaat B Lucher y na mesa R Dirksz.
Den e otro wega nos a haya informacion cu United ta gana di RCS cu score minimo di 1-0 caminda e gol tabata un autogol.
Y asina e tabla di posicion ta keda cu na prome lugar Brazil Jrs cu 6 punto den dos salida faltando un wega ainda contra di United.
Na di dos lugar ta keda United cu dos wega hunga un wega gana y un wega empata cu 4 punto.
Na di tres lugar ta FC Porto cu un wega gana y un wega empata y un wega perdi cu 4 punto.
E diferencia di gol ta duna e equipo di United ventaha riba e tabla di posicion caminda cu nan tin mes un cantidad di punto cu FC Porto pero FC Porto tin mas gol contra cu nan.
Y den sotano ta keda e equipo di RCS cu den tres salida ta perde tur tres wega.
Segun schedule proximo wega lo ta Dialuna 4 di juni caminda cu United lo topa di Brazil Jrs den CDGT pa 8or pm.
Y Diamars 5 di Juni lo topa otro FC Porto contra RCS tambe den CDGT pa 8or pm.
