Brasil a gana e campeonato Copa America 2019 pa di nuebe biaha. E hungadonan Everton, Gabriel Jesus y Richarlison a anota e tres golnan contra Peru, pa caba e wega cu score di 3-1, den e ultimo wega cu a tuma luga na Maracanã awe diadomingo atardi.
Brasil, siendo anfrition di Copa America e aña aki a pica dilanti ora cu na di 15 minuut di wega caba Gabriel Jesus a pasa dos defensa di Peru, pasa bala pa Everton, cu a hay’e su so dilanti gol…y a anota e prome gol di wega.
Peru a neutralisa e expectativanan di e Brasileronan ora Paolo Guerero a anota un pinalti despues di carchi geel pa Thiago Silva. E score sinembargo no a keda largo empata, pasobra algun momento despues Gabriel Jesus a anota un gol pa Brasil pa haci e score 2-1.
Peru a sigui pusha pa un di dos gol, particularmente despues cu a saca Gabriel Jesus for di wega na di 70 minuut. Referee a dun’e carchi geel, su di dos, cu mesora a bira cora. Cu awa na wowo el a baha veld. Pero den e ultimo minuutnan di wega, Richarlison, cu a subi veld como substituto y a logra un pinalti. Asina e wega a caba cu score di 3-1 na fabor di Brasil.
Esaki ta e prome titulo pa Brasil, despues cu nan a gana e titulo di campeon di Copa America na aña 2007, pues 12 aña pasa. Di otro banda, esaki ta e prome trofeo pa e coach Tite, cu a tuma e timon over di e ekipo tres aña pasa.
