E oil spill na costa di Venezuela, cu a pasa algun dia pasa, Bureau Rampenbestrijding Aruba (BRA) tabata monitorea esaki. Den e ultimo 4 dianan aki, BRA a tuma contacto cu Caracas, ya cu esaki ta un situacion di Venezuela. Nan no a anuncia esaki conforme e tratado di Cartagena.
Esey a pone cu BRA a tuma contacto cu Rapid Tag, cu ta e agencia di Caribe cu tin di raporta, pero nan tampoco no a haya informacion aki. Esey a pone cu nan a tuma contacto cu Caracas pa haci investigacion, pasobra nan ta mas cerca. Diabierna durante oranan di mainta a bisa cu por constata e oil spill na e costanan di Aruba, pero despues di a tuma contacto un biaha mas cu Caracas e noticia tabata positivo.
Rino Hermans, hefe di e departamento, a bisa e derame cu a tuma luga na Palito, Venezuela, a keda conteni. E derame a move y Morrocoy a keda destrui, esta e ecologia maritimo. E ecologia en general a haya un golpi duro cu e golpi aki. Segun e ultimo data ricibi di expertonan di Venezuela y esnan cu a haci e investigacion no ta mira peliger p’e islanan A-B-C.
Pa BRA tabata importante cu unda e derame a cuminsa, a contene esaki. E departamento ta sigui monitorea e situacion, unda tabata den contact cu Guarda Costa. Durante nan patruya por tira un bista ya cu no tin vuelo pa Venezuela y mira si tin un oil spill cu ta menasa pa Aruba. Guarda Costa a duna nan cooperacion cu durante patruya si ripara algo abnormal, nan lo notifica BRA. Segun Hermans, asina por tin un adelanto riba e situacion. BRA a declara cu e noticia cu ta circula riba media social, e derame actualmente no ta un menasa pa costanan di Aruba.
