A condena Presidente di Surnam Desi Bouterse na 20 aña di prizon pa “Decembermoorden” di 1982. Esaki a wordo anuncia door di Krijgsraad diabierna atardi. E tempo ey Bouterse tabata lider di e regimen militar y complice na tortura y ehecucion di 15 Surnameño critico. Hues sinembargo no a ordena su detencion.

Krijgsraad ta haya cu e sospechonan contra Bouterse ta proba. Como “bevelhebber” el a tuma e decision pa aresta 15 contrincante politico di su regimen, dia 8 di december, 1982, y ehecuta nan den Fort Zeelandia. E tempo ey Bouters a declara cu e victimanan a trata di tuma poder y cu a tira nan mata ora cu nan tabata trata di huy. Segun Krijgsraad, e storia di e golpi di estado ta inventa y cu ta imposibel pa huy for di Fort Zeelandia.

Di forma repentino Krijgsraad di Surnam diabierna merdia a dicta e prome sentencia di e proceso penal di asesinatonan di december. Den esey, Bouterse, actual Presidente di Surnam, ta e principal sospechoso. E tempo ey e tabata comandante di Ehercito Nacional, y desde 1980 ta na poder despues di un golpi estado. Ministerio Publico a exigi 20 aña di castigo contra dje. Vocero di Bouterse via di un mensahe na radio di estado a pidi e hendenan pa keda trankil. El a bisa cu e sentencia ta un intento di Hulanda pa isola e politico Desi Bouterse. “Mi ni sa si tin pruebanan contra Bouterse di e Decembermoorden”.
Sentencia di morto

Diferente testigo a declara cu Bouterse tabata presente na momento di e ehecucionnan den Fort Zeelandia. A trece tur e victimanan un pa un dilanti dje, unda cu personalmente el a bisa nan sentencia di morto. Un testigo a declara despues cu Bouterse mes a tira mata e ex lider sindical Dyrill Daal y ex militar Soerendre Rambocus. Pa esaki OM no tin prueba.
Declaracion crucial den e caso aki ta e lider sindical Fred Derby. E tambe nan a aresta e anochi ey y hiba Fort Zeelandia, pero pa motibonan desconoci a lague liber. El a fayece na 2001, pero a laga un declaracion atras di e sucedido. El a bisa cu Bouterse den forma trankil y cu sanger friu a tuma e decisionnan y cu di antemano tabata palabra cu lo deshaci di e victimanan.

Bouterse semper a nenga cu e tabata presente na e ehecucion. Si el a ofrece su disculpa na 2007 pa loke a pasa, pasobra e tempo ey e tabata politicamente responsabel.

Na e momentonan aki e presidente di Surnam ta riba un bishita di estado na China. No ta conoci kico ta bay pasa awo. Den teoria, un Presidente por duna su mes “gratie”.

Comments

comments