Autoridad di Aruba a bay den accion despues cu a tuma nota cu un boto a yega tera entre Baby Beach y tambe Santana di Cacho.
Tanto Kustwacht como polis a cuminsa cu un buskeda.
A topa cu e boto, pero no a topa cu ningun hende. Tampoco e boto tabata tin motornan riba dje. Ta sospecha sea cu na momento cu el a dal den baranca, subi tera, e motor a wordo ranca y a bay fondo, of ta calcula cu nan lo a logra kita e motornan y baha na awa cun’e, somenta cu e motornan.
Tambe tabata tin tankinan di gasolin cu tabata abordo. Durante dia Polis Maritimo a bay na e sitio y cuminsa cu un investigacion mesora, hunto cu kustwacht y polis, cu ya caba a drenta Colony, sin cu a logra haya ningun hende cu por tabata tin di haber cu e boto cu a drenta ilegalmente Aruba.
Ta sospecha cu e boto aki a trece ilegal, droga y arma pa nos isla. Lama ta basta bruto y naturalmente esey ta stroba e trabao di autoridad na momento cu nan ta haciendo nan trabao di vigilancia pa botonan ilegal cu por ta yegando tera.
E botonan aki hopi biaha ta wordo horta na Venezuela y asina ta sali cu nan pa Aruba y den e caso aki “La Falua”, cu matricula 5579, ta procedente di Puerto Cabello.
E boto awor ta bay wordo warda na warda di Balashi, banda di un otro boto, cu algun tempo pasa tambe a wordo haya na e mesun area y despues lo bay destrui e botonan aki.
Mirando cu probablemente lo ta un boto horta, dificilmente por logra na yega na esnan cu ta responsabel. Pero un cos ta sigur, esnan cu a yega cu e boto, ta na Aruba y ta riba tera y nan no a wordo gara ainda.
Esey no ta nifica cu nos costa no ta wordo controla. E vigilancia ta continua na nos costanan, tanto pa polis maritimo, como polis riba caya, Kustsurveillance y Kustwacht, tanto riba lama como riba tera.
Tin un bista riba e boto aki y esnan cu lo por a yega cu e boto. Ta keda pendiente. E mensahe lo wordo manda pa Venezuela tambe, na autoridadnan encuanto e boto “La Falua” cu su matricula 5579 cu a yega Aruba den oranan di marduga.
