Relaciona cu peticion di e piscadonan na Minister Chris Romero pa por subi laman durante oranan di anochi pa realisa nan practica y teniendo na cuenta cu oranan di anochi ta considera como e miho momento pa pisca, e Minister a anuncia e posibilidad pa por ta riba laman durante oranan di Toque de Queda.
E posibilidad pa por subi laman durante orario di Toque de Queda, ta mara na cierto condicionnan:
- E boto mester ta registra na Directie Scheepvaart Aruba como un boto di pesca (vissersboot)
- Por tin te cu un maximo di 3 tripulante riba e boto di pesca
- Mester ta riba laman prome cu Toque de Queda drenta na vigor y yega bek despues cu esaki finalisa
E posibilidad aki ta valido solamente pa botonan debidamente registra na Directie Scheepvaart Aruba como boto di pesca (vissersboot) y lo keda valido tanten cu Toque de Queda ta na vigor.
