Dialuna marduga a drenta informacion cu boto a drenta y a keda pega riba e rif na Santana di Cacho. Un boto tipo ‘ speed boat ‘ a keda pega na costa y esnan abordo a baha y disparce den vecindario.
No ta conoci si ta trata di droga, arma of cantidad grandi di hende cu a bin abordo. Polis a sera e area completo di Sero Colorado / Colony pa asina tira bista pa esnan cu por a yega abordo di e lanchai. Por a mira cu tabata tin un jerrycan yena cu gasoline abordo. Polis a haci control riba tur esnan cu nan por a topa den area pa wak si por a tende of mira algo. E personal di Kust Surveillance durante nan patruya a topa cu e boto. Asina a bati alarma pa manda mas unidad pa duna un man.
Claramente por mira cu e radar no a capta e señal di e boto. El a yega ten a tera y esnan abordo a baha bay lagando e boto pega den seco. E personal di Kust Surveillance a drenta den lama y pega kabel of cabuya y trek e boto yega mas cerca na tera. Asina a logra bay abordo. Aunke tin patruyanan den oranan di anochi, tog e botonan ta keda drenta y poco biaha ta garando esnan cu ta abordo.
