Direktiva di fundashon Ride for the Roses ta konfirmá ku awe tardi a roba nan di plaka pertenesiendo na e registrashon pa partisipashon pa e aktividatnan di djadumingu 21 di yanüari pa Ride, Walk, Swim & Spin for the Roses. A pone outoridatnan mesora na altura i nan ta investigando e suseso.
E fundashon ta limitá su anunsio na lo siguiente:
No tabatin víktima. A envolví fundashon Slachtofferhulp pa asistensia.
E suma ku a hòrta na e robo ta varia banda di 250 florin.
E suma aki ta bastante abou entre otro pasobra ku mas be pa dia ta traspasá e plakanan aki pa perkurá ku na e sitio di registrashon no tin mas plaka ku loke mester di dje pa e aktividatnan normal.
E fundashon ta hasi un apelashon riba hende ku por tin tep balioso enkuanto e suseso pa mèldu esaki na e sentral di Kuerpo di Polis di Kòrsou.
E fundashon ta informá ademas ku e organisashon di registrashon i inskripshon ta sigui normalmente mayan i e dianan siguiente, manera planiá, na Orco Bank na Schottegatweg Oost.
