Bòternan di awa konfiská ainda ta bou di investigashon

Durante un kontrol rutinario ku funshonarionan di inspekshon ekonómiko di Ministerio di Desaroyo Ekonómiko (MEO) konhuntamente ku Ministerio di Medio Ambiente, Salu i Naturalesa (GMN) a hiba den un establesimentu komersial resientemente, a konstatá benta di algun bòter di awa ku tabata kontené alabes un supstansia no konosí den e bòter. Den kombersashon ku doño di e establesimentu aki e la indiká unda e la kumpra e produktonan.

Ku e informashon aki e dos ministerionan a bishitá e agente distribuidor di e bòternan di awa enkuestion pa asina risibí mas splikashon i alabes pa hasi nan tarea di inspekshon. Despues di inspekshon i kombersashon ku e doño di e establesimentu a yega na e palabrashon ku lo hiba algun di e bòternan pa un laboratorio lokal. Di e forma aki lo por investigá i haña mihó indikashon kiko e supstansia ku a konstatá den e bòter ta.

Lamentablemente den transkurso di e mesun dia aki nos ministerio a tuma nota ku riba retnan sosial e informashon eróneo a keda publiká den kua a duna di konosé ku a konstatá bichi den e bòternan di awa di un kompania lokal (kual un nòmber a wòrdu menshoná).

Mester bisa ku ningun funshonario di MEO no a duna e informashon aki na prensa. Ta asina ku MEO ta fungi komo bosero di e tim multidisiplinario i den e kalidat aki un di nos funshonarionan a wòrdu yamá dor di un radio emisora lokal pa asina duna deklarashon. Durante e entrevista aki, MEO a indiká ku e kontrol enberdat a tuma lugá i ku funshonarionan di GMN a hiba muestra di e bòternan di awa pa esaki por wòrdu eksaminá dor di un laboratorio lokal. Na momentu ku e resultado di esaki ta konosí e ministerio di GMN ta esun ku lo determiná kiko lo ta e siguiente paso si akaso algu iregular keda konstatá durante di e tèstnan di laboratorio. Esaki, mirando ku ta trata aki di un área di responsabilidat di e ministerio di GMN. Den e entrevista menshoná, e funshonario di MEO no a hasi menshon di nòmber di e produkto enkuestion ni tampoko di e agensia i muchu ménos ku a konstatá un bichi den e bòter.

MEO ta lamentá ku e informashon robes aki a keda plamá riba retnan sosial di e forma aki, sigur mirando tur e esfuersonan diario ku nos ministerio ta hinka den promoshon i stimulashon di mas empresa lokal. Esfuersonan no solamente pa mas kompania bende i krese lokalmente pero tambe pa esakinan yega na eksportashon di nan produktonan. Masoménos dos siman pasá a organisá e di dos edishon di “National Export Awareness Week” ku meta stimulá mas eksportashon serka empresarionan lokal. Ku esaki nos ta spera ku medionan di komunikashon i/òf personanan ku a duna i distribuí e informashon prematuro i inkorekto lo ta esunnan yamá pa rektifiká e informashon no korekto publiká.