Bosero nobo di Warda Kosta di Karibe

Desde 1 di yanüari Shalick Clement ta e bosero nobo di Warda Kosta di Karibe Hulandes.  Na momentu ku medionan di komunikashon tin pregunta tokante e organisashon nan por tuma kontakto kuné.

E ta remplasá Cynthia Devere kual a aktua komo bosero suplente despues ku Roderick Gouverneur a bai na yüli 2018. Shalick tin años di eksperensha riba tereno di merkadeo i komunikashon. Despues ku e la kaba su estudio di HEAO na Hulanda e la regresá Kòrsou bèk kaminda e la traha entre otro komo Relashonista Públiko.

“Komo bosero di Warda Kosta di Karibe lo mi duna informashon relatá na Warda Kosta su operashonnan i aktividatnan. Tambe lo mi ke konsientisá i informá e komunidatnan di e islanan den Karibe Hulandes tokante di seguridat i aktividatnan ilegal riba laman”; esaki sigun Shalick Clement. Warda Kosta ta gradisí Roderick Gouverneur pa e añanan ku e la laborá pa e organisashon i ta desey‘é eksito den su karera nobo. Warda Kosta ta deseá Shalick Clement eksito i yamé’bon bini na Warda Kosta di Karibe Hulandes.