Ta importante pa turistanan ku ta bishitá nos pais konosé nos historia i historia di nos héroenan nashonal. Asina nos tin entre otro nos héroe nashonal Tula kende a lucha pa dignidat i libertat.
Mirando e echo ku nos a nombra un Megapier na nòmber i honor di Tula, Frakshon di MAN ta di opinion ku ta importante i eminente pa laga pone un bòrchi ku e historia di Tula na e Megapier ku ta karga su nòmber.
Aktualmente tin solamente un bòrchi ku e nòmber di Tula na e Megapier pero na nos opinion esaki nò ta sufisiente pa konsientisá i eduká e turista riba nos historia i kiko Tula a nifiká pa e lucha di libertat pa nos pueblo.
Pa e motibu aki frakshon di MAN ta aserká Minister di Desaroyo Ekonómiko, mirando ku CPA ta kai bou di su Ministerio, pa aserká gerensia di CPA pa laga pone un bòrchi na Megapier Tula ku e historia di Tula. Nos ta sugirí pa CPA aserka Asosiashon Promoshon Konsenshi Istóriko pa haña informashon konfiabel di historia di Tula.
