Candelario “Booshi” Wever, lider di UPP, a reuni cu e gerencia di EcoGas y pa esaki a gradici nan. Di basta tempo e ta mirando kico ta sosodiendo den su totalidad di loke ta trata desperdicio domestico. El a ripara cu hopi cos tabata sosodiendo riba henter e tereno aki, particularmente e ultimo 1 aña y pico.
Prome cu esey UPP tabata haya cu hopi cos straño tabata pasando y awo el a haya splicacion. Booshi Wever ta hopi impresiona cu loke el a mira y ta kere cu mas despues e lo duna mas detaye di e bishita, unda cu hopi hende a bin eynan. E ta contento di por a haci esaki y ta spera cu e informacionnan ricibi por yud’e traha mas, pero tambe bin cu mas informacion pa pueblo.
E ta sinti cu pueblo no sa di nan y esaki ta hopi importante. E meta di UPP ta pa informa pueblo kico ta sosodiendo y kico lo bay sosode, kico ta e consecuencianan di cierto decisionnan cu probablemente lo ta tuma. UPB a skirbi riba e consecuencianan financiero pa cada hogar y awo lo bay compara esaki cu e informacionnan ricibi. Tur esaki ta pa asina Booshi Wever por duna un miho splicacion y duna mas detaye di ki consecuencia tin financiero pa pueblo di Aruba pa ora di mira e procedura. E fix bidding cu Otmar Oduber ta bezig cun’e na unda e ta complace cierto miembronan di e scorpio cartel pa asina pueblo por sa kico ta bay warda nan ora cu e persona aki sigui cu su plan diabolico.
El a manda un carta pa tur hende, pa companianan cu ta trahando riba e asunto di desperdicio. Booshi Wever a manda carta pa EcoGas, Serlimar y Johnson unda cu e por haya un bista di kico nan ta haciendo. Asina aki e lo por haya un bista mas amplio. Ta di lamenta cu e gerente di EcoGas kier a lag’e mira con nan ta hiba e material riba Ser’i Teishi y con nan ta trat’e, pero a prohibi’e di drenta. E ta di acuerdo cu no ta tur hende por drenta, pero nan sa cu kico e ta bezig.
Gerente di EcoGas a compaña Booshi Wever pa nan por a mira e trabounan, pero a nenga nan entrada. Booshi Wever ta kere cu probablemente nan tin algo di sconde y no a spera cu e lo a yega. E no por a imagina cu nan lo a nenga bishita, e peticion cu el a haci. Nan a percura cu ora el a yega, e no mag mira cosnan cu e no mag.
Mirando con den e ultimo tempo a maneha Serlimar riba instruccion di Otmar Oduber, e ta kere cu ta logico cu no a laga su persona drenta. Esaki ta cosnan cu ora ta tende gobierno papia cu nan ta transparente y ta integro. Esakinan ta prueba cu realmente no tin integridad, no tin transparencia y tin coy sconde. P’esey nan no ta laga hende drenta pa mira kico ta sosodiendo eynan.
