Candelario “Booshi” Wever, lider di e partido politico UPP, no ta compronde di con e Presidente di sindicato STA Diego de Cuba, no ta menciona nomber di Otmar Oduber como esun responsabel pa e desaster cu tin aworaki na SERLIMAR. El a bisa di ta lamenta e accion cu a tuma luga na e compania y na mesun momento ta bisa cu e tin comprension pa e trahadonan.
Ta haci manera cu no tin nomber ni fam pa esun cu ta responsabel pa loke ta pasando na Serlimar. E situacion aki ta data di hopi tempo pero a bira pio despues cu Otmar Oduber a bira Minister encarga cu Serlimar.
Ta hopi pecular cu niun momento de Cuba a menciona nomber di Otmar Oduber, cu ta esun cu a duna instruccion pa tur e bagamunderia den Serlimar y presidente di STA sa masha bon di esaki. A scoge of pone man riba cierto hendenan, segun Wever.
Dia 15 di juni, tabatin un combersacion entre director di Serlimar, bewindvoerder, Minister di Finanza y esun encarga cu Serlimar, y a keda palabra cu lo deposita placa pa haci e pagonan aki. E cos mas straño ta cu diaranson merdia a manda e transferencia pa Serlimar, despues di un siman y net riba e dia cu tin inval na cas di Otmar Oduber. “Mi no kier pensa malo, pero ta puntra mi mes si e vloer a bira demasiado cayente y diripiente ta deposita e placa. Por a evita tur e problemanan door di duna e trahadonan loke tin derecho riba dje. Lamentablemente wega politico ta wordo hunga,” Booshi Wever a bisa.
E ta lamenta cu de Cuba ta hunga e wega cu esnan den Gobierno y esnan den Serlimar cu kier evita pa sali afo unda e placa a bay. Gobierno mester haci tur lo posibel pa Serlimar keda den man di Gobierno y evita cu e ta bay den mannan priva.
Wever a keda señala movecionnan straño den e asunto di Serlimar pa cual e no ta kita di e impresion cu un wega ta wordo haci. Mas ainda si ta coy e arma pisa cu trahado tin, pa bay den welga. Y ta lamenta cu a stroba empleadonan cu si tabata kier a traha, y a perhudica pueblo.
