Booshi Wever: Serlimar ta sigui desangra door di un maneho devastador y un raad van toezicht morto na soño

Siman pasa a cera cu un posibel accion di e empleadonan di Serlimar y e siman aki a habri cu un truck di Serlimar cu na prome instancia a wordo nenga pa haya gasoil!!

E pregunta ta: dicon? Antes Serlimar tabata ser maneha, cu su fayonan, cu 16 miyon florin. Despues gobierno a aumenta esaki te na 26 miyon y awor casi tur dia tin un of otro problema cu pago di cualkier indole!.

Sinembargo, realidad ta cu e empleadonan mester sufri pa cierto afortunadonan si ricibi nan placa na abundancia. Por ehempel cierto periodistanan, e asina yama “influencers”, cierto sponsornan, Jouvert Morning (10 mil bubu) etc etc, si ta cobra na ordo. Siman pasa tabata premira un accion pasobra no tabata tin placa pa paga e “bashi-uitkering”. Te na ultimo momento a core paga esaki. Dialuna a habri cu un otro problema di pago.

Casi sigur cu nos lo bay tende cu ta pasobra e ley no a pasa, ta p’esey e cosnan aki ta pasa. Esaki ta e caso? Absolutamente no ta berdad.

Maneho interno y financiero na Serlimar ta un desaster 100%. Click link pa mas https://24ora.news/30iURIh

Posted by 24ora on Tuesday, January 14, 2020

Serlimar ta den e situacion penoso aki, pa motibo cu desde fin di 2018, ora cu Otmar a bira minister, corupcion, mal maneho y abuso di poder a bira algo normal. Pa colmo un Raad van Toezicht cu for di un principio tabata “dans naar de pijpen” di Otmar, enbes di tabata cuida e interes di nos pueblo Arubano. Pa completa obra, por medio di un procedura straño ta trece un persona for di Corsou, cu ta un artista di pura sepa, poniendo asina mas sauce den e bailamento na e “pijpen” di Otmar.

A trece un dimension nobo, ora cu e fiesta a bira mas candeloso. Asina p.e. partimento di barinan di sushi,  a bira un carnaval na segundo mitar di aña. Y pa cada un cos chikito tin fiesta.

Colaboracion cu e minister den e corupcion ta sigui  p.e. ora di compra di e incinerator chikito. Y pa colmo, despues di mas di un aña AINDA e incinerator chikito NO ta traha!! Y no dor di boycot, pero dor cu a cumpra un PORkeria!!! Cu poco palabra un DEROCHAMENTO di placa sin fin. Y ora un mocion a wordo presenta pa laga Algemene Rekenkamer haci un investigacion, “doodleuk” a rechasa esaki. Ta cos di sconde tin?

E “handpicked” mucha manda di Otmar a hunga su rol excelente di simpelmente haci loke e “regisseur” (Otmar) a bise pa haci. Y ora cu e tera a bira cayente bou pia di Otmar, esaki a baha na awa, manera un cobarde!! Ora cu nos a pensa cu e DEROCHAMENTO di placa lo a caba,  y cu e maneho financiero lo tuma lugar manera mester ta, nos a tuma nota cu e “bonche” ta sigui. Nos por a compronde cu miles di florin a wordo paga na varios “periodistanan”, station di radio, tv y no lubida e asina yama “influencers”. Pa pone e cherry riba e bolo nos a bin compronde cu Serlimar lo sponsor den Jouvert Morning cu 10mil florin y a sponsor e contest di calypso hubenil tambe! Siman pasa a nenga di duna e empleadonan di Serlimar un refresco y nan mester a keda contento cu awa, pasobra NO tin placa pa cumpra refresco.

Nos mester sigui soporta un maneho mediocre di e.o. un director mediocre y un Raad van Toezicht cu no ta haci un donder pa drecha e asunto? Unda e representante di gremio comercial y sindical a keda? Aki tambe ta “cani mi pami cani bo???

A bira tempo pa no solamente core cu e director mediocre aki, pero pone su persona responsabel tambe pa NO a defende nos patrimonio. Logico cu e no ta haci esaki, paso eno ta un Arubiano!! E por coy su “boeltje” y bay for di Aruba, pero nos pueblo lo keda cu e disaster cu ela permiti y a colabora cu Otmar. E Raad van Toezicht di Serlimar mester ser poni responsabel . Na Corsou un hunta asina a wordo condena pa negligencia y den e caso aki sigur tambe ta e caso na Aruba y cuidow cu no ta pio ya cu tin conflicto di interes tambe ta hunga un rol. Den un paar di palabra mester pone O.O. , e director handpicked, mucha manda di Corsou y e Ositonan Dormilon den e Raad van Toezicht responsabel pa esakinan. Asina e interes di e pueblo arubano lo wordo sirbi. E director mester “donder op” prome cu e haci mas daño na Serlimar cu al final nos pueblo lo mester bay paga p’e.