Den fin di siman prensa Venezolano a informa cu a detene ex Minister Booshi Wever relaciona cu contrabando di combustibel na costa di Venezuela. El a confirma cu el a haya problema cu autoridadnan, pero cu el a bay costa pasobra su boto tabata pasando awa, manera ta ilustra riba e potret. Nan entretanto ta liber pero ta haciendo investigacion ainda riba e boto “Ki Diaaa”.
“Mi a tuma nota di publicacionnan cu a sali den medionan di comunicacion y social. Ta parce cu tin hende cu ta sinti hopi felicidad ora cu otronan ta pasa momentonan hopi fastioso den bida. Y esaki ta loke nos ta pasando aden. Mi kier informa cu nos ta resolviendo e loke ta pasando”, asina e lider politico y alabes ex Minister a laga sa riba su pagina di Facebook.
El a conta cu nan a sali pisca diahuebs mainta na Baho y a haya problema cu ambos pompnan pa saca awa (bildgepump). Eynan a tuma e desicion pa tira pa costa di Venezuela, considerando cu for di unda nan tabata, ta e punto mas cerca.
Booshi Wever a sigura cu di baina a yega costa di Venezuela. Nan a yega mas o menos 10or di mainta na e costa na un lugar cu yama Tumatey y a haci tur cos pa scapa e boto.
“Nos mes a scapa di baina”.
A notifica mesora cu nan a drenta pa motibo di un emergencia. Ta te banda di 4:00pm e autoridadnan a yega y cuminsa cu nan investigacion. Di acuerdo cu Booshi Wever, nan a coopera cu autoridadnan 100% y e resultado ta cu nan mes ta liber y e boto awe of mayan lo ser someti na un inspeccion. Den e fase ey nan ta. El a sigura cu autoridadnan a trata nan bon.
“Pronto nos lo ta na Aruba, algun lo ta contento pa esey y otronan ta decepciona cu esey. Esey ta bida”.
