Mundo henter ta pasando un periodo sin precedente. Mas cu nunca ta keda demostra con hopi nos ta depende di otro y cuanto nos mester di otro. Pero manera cos ta mustra, cu despues di e pandemia aki nos mundo lo no ta mescos mas, pues manera ta wordo bisa cu lo no ta “business as usual”.
Tambe nos tin di realisa cu como pais chikito nos lo mester di e man di ayudo for di otro paisnan, y den e caso aki Hulanda lo ta parce esun mas logico. Nos tin di realisa tambe cu e yudansa aki sigur lo no ta sin condicion.
Pero UPP a tuma nota si di un rumbo cu e discusion ta wordo hiba aki na Aruba, nos ta kere cu NO ta esun corecto. Esta, di tira culpa riba otro usando argumentonan cu den nos concepto no ta yuda resolve nos problemanan. Aki nos ta referi na e hecho cu Hulanda ta dispuesto pa yuda, pero e yudansa lo NO ta un “regaldo”. En berdad a base di articulo 36 di nos Statuut nos TUR, como parti di Reino, mester yuda otro. Hulanda como “madre patria” y esun cu su situacion economico ta mihó, obviamente ta e prome cu nos ta acerca pa e yudansa a base di articulo 36. Pero nos mester ta basta ingenuo di kere cu Hulanda lo bai djis “schrijf uit” un “blanco cheque” pa e suma cu e.o. Aruba ta pidi.
E schopmento contra Hulanda a cuminza ora Hulanda a declara cu e lo coopera, pero cu e ayudo lo no ta un “gift”. Nos por a lesa con algun miembronan di e Parlamento “nobo” ta usa argumentonan hopi fofo pa condena Hulanda. Ta menciona e.o. cu Hulanda ta dispuesto pa regala Italia y Spaña y nos no. Otro ta yama esaki abuso di poder.
Deliberadamente ta desinforma pueblo atrobe. Hulanda a bisa hopi cla cu ta dispuesto pa yuda e paisnan ey, pero e ayudo aki lo mester bay den un “Coronapot”, caminda tur miembro di e Comunidad Europeo lo mester participa y na unda reglanan di CONTROL ta tuma lugar. Pues ey tampoco lo bira un “blanco cheque”. E reglanan aki ta poni den varios decretonan na unda e reglanan di Good Governance ta vigente. Ta mas cu obvio cu exponentenan politico na Aruba ta asumi atrobe e rol di victima y ta polarisa, pa tapa cu Aruba mes no a y ni ta cumpliendo cu reglanan di Bon Gobernacion. Gobiernonan, sistematicamente, a keda “stel uit” tumamento di accion concreto pa e.o. garantisa Good Governance.
Den e momentonan dificil pa nos, Hulanda lo hunga un rol hopi importante. UPP no tin duda cu Hulanda lo ta dispuesto pa duna Aruba un man. Loke si nos mester realisa cu for di 2014 Hulanda a mete den asuntonan interno di pais Aruba dor di e debilidad di e gobierno di Aruba dirigi pa Mike Eman e tempo ey (AVPOR). Y MEP den oposicion tabata pidi pa bin cu solucionnan STRUCTURAL y DURADERO pa nos finanzas publico! E tempo ey parlamentarionan di MEP tambe a insisti cu lo mester cuminsa na institui reglanan di Bon Gobernacion. Nos di UPP e tempo di “Ensure” a urgi na tur partidonan politico pa uni y asina den un bloke nacional, hunto cu gremionan, atende cu Hulanda, despues cu nos yega na palabracionnan concreto aki na Aruba prome.
Pero, dicon gobiernonan di AVPOR y POREDmep den 6 aña no por a introduci e reglanan estricto di Good Governance? E contesta ta hopi cla. E politiconan den e gobiernonan aki kier sigui derocha placa y no lo permiti pa nan mannan wordo mara. Si nos a percura pa HUNTO a goberna drechi, mescos cu paisnan civico si ta haci, awe e situacion lo ta otro. Ya caba nos lo por a fia placa na un interes abou y nos pais lo ta ser goberna drechi. Pero NO, nos kier sigui e.o.nombra hende den servicio di gobierno, nos kier sigui otorga contractonan lucrativo na friends & family etc. etc. y awor e coronavirus a bin pa haci e situacion pio ainda.
UPP ta kere cu situacion cu a presenta aki, mester sirbi como un “wake-up call” pa nos tur. Nos mester realisa cu a yega e momento pa nos “re-diseña” e rumbo cu nos kier pa nos pais Aruba bay! Esaki por wordo haci den un Dialogo Nacional cu representacion di tur sector aki na Aruba. Y aki ta unda cu mester cuminsa na introduci reglanan di Bon Gobernacion pa MARA MAN DI E POLITICONAN. Pa di e manera aki tambe nos como BON ARUBIANONAN regla nos asuntonan “for once and for all”, mandando asina e señal cla y raspa pa Hulanda cu nos ta “take care” di nos mesun asuntonan.
Nos mester stop di usa e coronavirus como un kapstok y hunga rol di victima, cu e speransa cu Hulanda lo cay sin mas pa nos. E bala ta den nos cancha awor, ban pone Aruba hunto “back on track”!
