Lider di UPP, drs. Booshi Wever a maneha pa hopi tempo stranheria na Aruba. E tabata awe mainta na DIMAS, unda cu el a expresa su preocupacion pa e maneho nobo cu MEP-POR-RED ta hibando cu esaki.
El a comenta cu for di basta tempo caba a riparando un maneho anti Arubiano. Esaki ta andando for di november 2009, unda cu por a mira un cambio total di maneho cu tabata tin prome, burlando di nos leynan. Por ehempel e ley di Swiss Model. Esaki a wordo trapa pa e gobierno anterior y e gobierno actual, constantemente. Si kier papia di integridad, aki por a cuminsa mira cu tur dia e pensamento di integridad no ta conta, pa motibo cu ta firma cosnan contra nos leynan.
Si ripara, den e ultimo simannan, cuanto hende ta wordo gara como ilegal. Despues minister ta haci un yamada y despues ta saca e persona afo, depende ken e ta. Sea cu ta un famia, un sponsor, bon conoci of ta haci un manifestacion.
Segun Wever, esaki ta incorecto, unda cu e pueblo Arubiano no ta wordo sirbi. Miembronan di Guarda nos Costa, ta haciendo lo posibel pa caba cu tur ilegalidad na Aruba, nan ta manera mara nan man cada biaha y esaki ta preocupante.
Si pone esaki den bista di e maneho cu awor aki ta wordo cambia door di minister, door di DIMAS y tambe minister Glenbert Croes na DPL, mas preocupa Wever ta, cu e maneho anti Arubiano aki lo conduci, cu pronto e Arubiano lo disparce.
Den DPL mes nan no ta papia di Arubiano mas, nan ta papia solamente di local. Nos a wordo poni den full un bunch cu tur otro hende. Nos como Arubiano tin derecho. No por djis trap’e y hink’e den e mesun baliña cu tur hende.
Tambe, por a ripara cu den e maneho nobo di DPL por ehempel, e Mericano cu e Macamba, despues di un aña ya caba nan no mester bay toetsing na DPL.
Kico esaki kiermen?
Despues di un aña e cantidad di Macamba y Mericanonan cu por bin aki, despues di un aña, ya caba nos Arubianonan no ta wordo considera of no ta wordo poni den consideracion.
Kico ta pasa cu nos yiunan di tera?
Nos Arubianonan cu a bay studia afo pa bin traha na Aruba, no ta bay haya trabao mas, pasobra e Mericano of e Hulandes ta ocupa nan. Pio ta bira ainda, ora cu ta bolbe lesa den DPL, e rapport cu tin, unda cu ta pone excepcionnan, por ehempel tur hende cu bay traha na hospital, dokter y enfermeronan, basa riba e landsverordening Uitoefening geneeskunst, no mester bay DPL mes. E dokter cu bin traha, sea dokter Hulandes, dokter Antiano, of e enfermero(a), no mester bay DPL.
Kico bo ta haci cu e tantisimo yiunan di tera cu a studia medicina, no solamente na Hulanda, pero den region tambe, cu tur hende ta papia cu awo tur hende mag bin traha y via un maneho nobo di DPL, induci door di minister Glenbert Croes, ta bay stroba nos yiunan di tera pa bin.
Pa Wever, esaki ta increibel con un Gobierno cu ta papia cu hende ta central, pero aparentemente e Arubiano sigur sigur no ta central.
