Booshi Wever: Cumbre di Gobierno tabata un cos di hari

974

Esaki ta e palabranan cu e politico y lider di UPP tabatin pa e Cumbre cu Gobierno a organisa cu gremionan comercial y sindical via di un zoom meeting. E tema ta relaciona cu e negociacion cu Aruba tin cu Hulanda riba financiamento di diferente programa y di presupuesto di Aruba.

El a considera e evento mas bien un discurso nacional di Prome Minister Evelyn Wever Croes kende a trece hendenan cu ta papia loke cu e kier pa nan papia. Na final a haci pregunta, pero no a haya chens pa duna un “statement” politico, ya cu e ta invita como un lider politico. “Mi ta haya e cos aki lamentable y puro un show, unda cu ta papia di un Cumbre (Top overleg) cual no tabatin nada di esaki.”

Booshi Wever di UPP ta reacciona riba Cumbre cu Gobierno a ornagisa

Posted by 24ora on Thursday, August 13, 2020

Hasta a pidi pa Dialogo Nacional pero no a logra y ta lamenta cu e mandatario ta manipula cu informacion. Por ehempel e entidad nobo cu ta bini, segun e Memorie van Toelichting di e concepto di ley, ta bisa cu e ta bini despues y no den consulta cu Gobierno. Esaki, e politico ta bisa, ta nifica cu simplemente ta informa y no tin nada di consulta den henter e tareanan cu e entidad ta haya. A uza TeleAruba pa haci e propaganda aki cu un transmision LIVE di e zoom meeting.

E yegada di e entidad OHH (Orgaan voor Hervorming en Herstel) ta nifica cu e Status Aparte cu Aruba a logra ta na filigrana. “Si compara loke cu a pasa 70 aña pasa den Tweede Kamer cu Aruba a keda cu su 8 asiento y Corsou a haya 4 mas, loke ta pasa awo ta pio cu e traicion ey. Mas tristo, sobrino di Libertador Betico Croes a sostene pa yiu di Betico Croes bay di acuerdo cu un traicion asina. Aki Aruba a perde mahos, pasobra Aruba a perde mahos y no tin su autonomia.”

E ta conclui cu Aruba mester di un “zaken kabinet” ya cu Aruba su problema no ta totalmente di Covid-19, pero door di politiconan cu nan man ta mucho los. Den tur e situacion malo, tin nombramentonan tumando luga. Den aña electoral lo sigui haya tipo di manipulacionnan. Pa haya confiansa di Gobierno, mester cera cabes y bini cu un Zaken Kabinet y demostra cu tur hende kier un cambio. Niun politico lo bay tuma e pasonan pa drecha e situacion pa Aruba.

El a cuestiona tambe e hecho cu PM a bisa cu no tin “deadline” y pesey e ta puntra pakico a core yama un “bijeenkomst” di Parlamento awe cu Prome Minister.